Endometriosia eta transexualitatearen ikusgaitasuna aldarri, udaletxea argituko dute
Bihar eta etzidamu (hilaren 29 eta 31) Irungo udaletxeko fatxada argituko da, endometriosia eta transexualitatearen inguruan kontzientzia pizteko.
Bihar, hilaren 29, Endometriosiaz Kontzientziatzeko Egunaren harira, udaletxeko fatxada horiz argiztatuko da, 20:31etatik 00:00ak arte. Ekimena EndoEuskadi elkarteak (Endometriosia duten Emakumeen Euskadiko Elkartea) bultzatu du eta helburua edometriosia ikusgai egitea eta gaixotasunaren inguruko kontzientzia sortzea da; mundu osoan milioika emakumeri eragiten dion gaitza izanda ere, gabezia handia baitago eskaintzen zaizkion baliabideei eta kontzientzia publikoari dagokionez.
Era berean, hilaren 31ean, Trans Ikusgaitasunaren Nazioarteko Eguna dela-eta, fatxadako udalaren argiak piztuko dituzte beste behin, trans banderaren kolorez (arrosaz, urdinaz eta zuriz), Naizen Adingabe Transexualen Familien Elkarteak eskatuta. Efizientzia energetikoa medio, 20:33etan piztu eta 23:00etan itzaliko dituzte. Helburua trans pertsonak ikusgai egitea eta egunerokoan dituzten erronken inguruko kontzientzia sortzea da, “errespetua, berdintasuna eta inklusioa” sustatuz.
