Asteburu hau gakoa da Biok Txingudirentzat
Bigarren fasea bukatzeko gutxi falta zaio Bidasoko taldeari eta hirugarren postuan sailkatzeko aukerak baditu. Bihar dute partida.
Bi norgehiagoka baino ez zaizkio gelditzen Biok Txingudiri ligako bigarren fasea bukatzeko eta hirugarren postuan sailkatzeko aukerak oraindik eskura ditu. Bihar izango du partida etxean eta Durango Ermamotor jasoko dute. Durangok 20 puntu ditu, Txingudik baino 6 gehiago, eta Bidasokoek irabazi egin behar dute matematikoki hirugarren posizioa eskuratu nahi badute.
Bestalde, Txingudik bigarren itzuliko azken bi partidak irabazi beharko ditu, eta durangarren porrota azkeneko jardunaldian garrantzitsua izango da, sailkapenean aurrea hartzeko. Erronka zaila bada ere, Asier Gonzalez, Alejandro Lasa eta Patxi Artolak zuzendutako taldea gogor lan egiten ari da ahal duen posiziorik onenean amaitzeko ligako fase hau.
14 urtez azpikoak
Bihar, 10:30ean, Txingudi/Orereta/Baztanek Gipuzkoako ligako finalerdiak jokatuko ditu etxean Hernani/Atleticoren aurka. Azkeneko partidetan asko borrokatu ondoren, mugako taldeak txapelketa irabazteko borrokan mantendu nahi du. Finalerdiak bi itzuli izango ditu, lehenengoa etxean jokatuz eta bigarrena datorren asteburuan izanik.
Rugby Olinpiadaren hirugarren edizioa
14 urtez azpikoen partidaren ondoren, eskualdeko ikastetxeen errugbi topaketa antolatu du Txingudi Errugbi Klubak. Xabi Sanchez, klubeko koordinatzailearen hitzetan, “ikasturtean zehar bisitatzen ditugun ikastetxeak elkarren artean partidak jokatzeko antolatzen dugu topaketa hau. Honela, Plaiaundi ezagutzeaz gain, errugbiaren beste elementuak erakusteko aukera eman digu ekitaldi honek”.
Kirol Aukera eta Pasquier Recondo enpresek laguntza berezia emango diote klubari ekitaldi honetarako.
Aurreko asteburuan, 18 azpikoek garaipena gertu izan zuten
Gabiria Txingudi/Bera Bera/Baztan 18 urtez azpiko taldearen lerrokatzean Txingudiko sei jokalari aritu ziren: Hodei Aizpurua (kapitaina), Aritz Arrieta, Markel Moratinos, Rares Radulescu, Julen Etxeberria eta Aitor Emazabel.
Norgehiagoka modu ezin hobean hasi zuten Bidasokoek, hirugarren minutuan lehenengo entsegua egin zuten-eta (5-0). Euriak eta haizeak gauzak asko zaildu zituen, baina baloia kontrolpean izan zuten jokoaren fase gehienetan. Lehenengo zatiaren amaierarako minutu batzuk baino falta ez zirela, bigarren marka eta eraldaketa lortu zuten gipuzkoarrek, 12 eta 0ekoa jarriz markagailuan.
Atsedenaldiaren ondoren, La Unicak aurrera egin zuen indarrez eta, 39. minutuan, aldea murriztea lortu zuen entsegu eraldatu baten bidez (12-7). Partida parekatua mantendu zen 54. minutura arte, touch-maul baten ondoren, Hodei Aizpuruak hirugarren entsegua lortu zuen. Eraldaketa sartuta, emaitza 19 eta 7koan jarri zuten.
Segidan erantzun zuen La Unicak eta bost puntu gehitu zituen bi minutu geroago (19-12). Amaieran, etxekoek erritmoa jaitsi zuten eta iruindarrek berdinketa lortzeko aprobetxatu zuten (19-19).
Beteranoek bere eguna ospatu zuten
18 urtez azpiko taldearen partida baino lehen, Txingudi, Rioja, Emak Hor eta Bera Berako beteranoek Bidasoako taldeak urtero egiten duen ekitaldian parte hartu zuten. Tokata modalitatean, hau da, plakaketarik gabe jokatu zuten. Partiden ostean, denek batera errugbian tradizionala den hirugarren denbora partekatu zuten.
