Muara taberna "berpiztuko" dute
Larunbat honetan 18:00etatik 02:00etara zabalduko dute Muara. Pintxoak eta edariak eskaintzeaz gain, datozen hilabeteetan egin asmo dutenaren informazioa azalduko dute ere.
Muara tabernak larunbat honetan zabalduko ditu ateak, eta ez da irekiera puntuala izango, asmoa Muara “berpiztea” baita. Hala azaldu du Ekhine Alzak. “Aurkezpen bat egingo dugu junta aldaketa egon delako, eta horrekin batera, elkartu delako talde bat Muarari erabilera bat emateko prest dagoena”. Larunbat honetan, beraz, datozen hilabeteetan egin asmo dutenaren inguruko informazioa eskainiko dute.
Aurreratu duenez, Muara hilabetean behin zabaltzeko asmoa dute, ekintza kulturalak egiteko eta ezker abertzaleak duen lokal horri erabilera bat emateko: “Izan dokumental bat ikusi eta haren inguruan hausnartu, izan mus txapelketa bat edo serigrafia egiten duen norbait ekarri…”. Oraindik agenda guztiz itxita ez dutenez, jendearen proposamenak jasotzeko prest daudela gaineratu du.
Larunbatean 18:00etatik aurrera pintxoak eta edariak eskainiko dituzte, baina taberna baten gisan soilik funtzionatu ez dezan, arratsaldean futbolin txapelketa bat edo mahai jolasak antolatuko dituztela azaldu du ere, eta gau aldera DJ batek musika pintxatuko du, goizeko 02:00ak arte.
Herriko gazteak eta normalean Muarara gerturatzen ez direnak animatzea gustatuko litzaieke antolatzaileek, “ikusteko badagoela espazio bat ohiko tabernez eta Qaz gain gauza ezberdinak egiteko erabili daitekeena”.
