HITZAren Neguko Argazki Lehiaketaren erakusketa, zabaltzear
Errenteria-Oreretako Arkaitza tabernan zabalduko du HITZAk. Daniel Novas Saez eta Eider Iragorri Arbonies izan dira lehiaketaren irabazleak.
OARSO BIDASOKO HITZAk bigarrenez egin du Neguko Argazki Lehiaketa. Dozenaka izan dira hedabideak jaso dituen negu kutsuko irudiak. Horien artean, bi sari eman dira: lehena, epaimahaiak erabakitakoa, Daniel Novas Saez errenteriarrak irabazi du, Jolastu argazkiarekin; bestea, irakurleek herri bozka bidez emandakoa, Eider Iragorri Arbonies oiartzuarrarentzat izan da (herritarren botoen %33,9 jaso zuen), Behorra ur bila argazkiarekin.
HITZAk jada eman dizkie sariak biei: Novasi, Errenteria-Oreretako Valentin Foto Bideoa komertzioan baliatzeko erosketa bonu mardula; Iragorriri, berriz, Errenteria-Oreretako Gaztelu Ostatuan otordua. Hirugarren sari bat ere izan da: herri bozketan parte hartu zuten guztien artekoa. Kasu horretan partaide horien artean zozketa egin, eta Ane Dehesa Urkiak Errigoraren produktu sorta jasoko du.
Asko izan dira HITZAk jaso dituen neguko argazkiak. Ikusgarriak gehienak. Hala, horietaz gozatzeko aukera jendaurrera zabaldu du hedabideak: hilaren 30era arte, Errenteria-Oreretako Arkaitza tabernan (Gamon Zumardian dago) argazki guztien erakusketa zabalik izango da, udaberria heltzen ari den honetan, negua ere izan dugula gogorarazteko.
HITZAtik doakiela eskerrik beroena parte hartzaile guztiei, botoa eman duten herritarrei, eta bigarren sariketa honetako sariak eman dituztenei.
Beheko irudietan, Daniel Novas Saiz eta Eider Iragorri Arbonies irabazi dituzten sarien agiriekin, baita irabazle izateko HITZAra bidali dituzten argazkiak ere.
-
- Dani Novas Saezen ‘Jolastu’ argazkia.
-
- Dani Novas Saez, saria eskuan.
-
- Eider Iragorri Arboniesen ‘Behorra ur bila’ argazkia.
-
- Eider Iragorri Arbonies, saria eskuan.
