Emakumeen Xake Ttopara gero eta indartsuago
Aurtengo edizioan 18 emakumezkok parte hartu dute, adin guztietakoak. Helburua ezagutza elkarbanatzea, elkar hauspotzea eta ondo pasatzea izan da.
Berdintasunaren eta talentuaren aldeko zazpigarren jardunaldia egin zuten atzo Marlaxka Xake Klubak egoitza duen Kasino Zaharrean. Zazpigarren urtea da Emeki elkartearekin lankidetzan Emakumeen Xake Ttopara antolatzen dutena eta urtetik urtera sendotzen diharduen topaketa da.
Aurtengo edizioan 18 emakumezkok parte hartu dute, adin guztietakoak. Horrek xarma berezia eman zion topaketari, helburua ezagutza elkarbanatzea, elkar hauspotzea eta ondo pasatzea baitzen.
Laguntzaile zein arbitro gisa aritu ziren Nerea Uranga Marlaxka Xake Klubeko lehendakariordea, Tamara Sastre Emeki elkarteko lehendakaria, Goio Uriarte Marlaxka Xake Klubeko kidea, eta klubeko irakasleak diren Patxi Diaz, Agustin Querejeta eta Peio Virto.
4 txandetako suitzar sisteman jokatu zituzten partidak, eta bakoitzak 10 minutuko denbora izan zuen xake matea egiteko. Nora Lerak, xake klubeko promesa gazteak, irabazi zuen topaketa.
Lehia bukatutakoan sari banaketa egin zuten, eta parte hartzaile guztiek oparitxo bana jaso zuten: Maria Jose Noainek sinatutako Las mujeres en la historia del arte liburua. Sariak Lupe Queiruga Kirol zinegotziak, Tamara Sastrek, Nerea Urangak, Tzane Carrillok (klubeko diruzaina), eta Maria Jesus Berrotaranek (klubeko bokala) eman zituzten.
