Zibererasoa jasan du Irungo Udalaren webguneak
Ordu gutxiren buruan geldiarazi dute erasoa. Gaur derrigorrez Internetez egin behar ziren hainbat tramite, biharko (osteguna) 23:59ak arte egin daitezkeela jakinarazi du udalak.
Gaur (hilak 5, asteazkena) zibererasoa jasan du Irungo Udalaren webguneak. Udal erakundeak zehaztu du haienaz gain, beste erakunde batzuen atari digitalak ere izan duela hackerren erasoa. Ondorioz, zenbait orduz erabileratik kanpo izan dira webgune horiek. “Erasoa detektatu bezain laster, udaleko informatika zerbitzuetatik lan egin da egoera konpontzeko, eta udal webgunea normaltasunera bueltatu da”, azaldu dute udaletik.
Gaur, hainbatek derrigorrez zenbait tramite eta kudeaketa lan egin behar zituzten herritarrek webgunearen bitartez, hala zegokielako. Udal atarira sartzeko izan diren arazoengatik, gaurkoan egin behar ziren tramiteak, biharko (osteguna) 23:59ak arte egin daitezkeela adierazi du udalak.
Sortutako arazo eta eragozpenengatik barkamena eskatu du Irungo Udalak.
