Lesotho, Zure Abenturaren Bila programaren hurrengo protagonista
'Lesoto: Afrikako Mendietako Erreinua, bizikletaz' saioaren txanda izango da ostegun honetan, hilak 6.
Denboraldi honetako Zure Abenturaren Bila programaren 11. saioa egingo da ostegun honetan (hilak 6) eta Afrikara joango dira. Lesoto: Afrikako Mendietako Erreinua, bizikletaz dauka izenburua hilabete honetakoak eta Igone Mariezkurrena bidaiariarena izango da hitza.
Amaia KZko hitzaldi aretoan elkartuko dira, 19:30ean eta sarrera doakoa izango da. Saioa euskaraz izango da eta Afrikaren alde ezezagun bat erakustea izango du ildo Mariezkurrenak.
Aurrerapena
Mariezkurrena: “Aurrenekoz Lesotoren berri izan nuenean, kokalekua bilatu behar izan nuen mapan; horrek izugarri erakarri ninduen. Azaleraren % 80a 1.800 metrotik gorako garaieran dago, horregatik esaten diote Mendien Erreinua. Orografia menditsuak eta turismoa sustatzeko harribitxi nabarmenik ez edukitzeak nahikotxo isolatu dute Lesoto urteetan. Nor ote dira manta, katiuskak eta buruberokoa soinean bizi diren horiek? Txirrindola baino bidelagun hoberik ez zitzaidan bururatu Afrika ezezagunenean murgiltzeko”.
