Elektroplaza festibala, apirilaren 5ean
Urdanibia plazan izango da jaialdia, eta hainbat egun lehenago emango diren DJ ikastaroak ere barnebiltzen ditu jaialdiak.
Maiatzetik apirilera aldatu dute Elektroplaza jaialdiaren data eta apirilaren 5ean egingo da. Lekuak Irungo plaza gorriak izaten jarraituko du, Urdanibia plazak, eta aurreko edizioan izan bezala, oraingoan ere “oso harrera ona” izatea espero du Sandra Caballero Gazteriako ordezkariak. Berarekin batera izan dira gaurko aurkezpenean Irune Muguruza eta Iñigo Jimenez N97-ko kideak eta GazteArtean Konekta zerbitzuko kide Iker Hernandez.
Nazioarteko artista “entzutetsuak” eta “industrian sartzen ari diren artista emergenteak” konbinatzen dituen festibaltzat jo du honakoa Caballerok. Bestalde, gogoratu du partaidetza bidezko aurrekontuetatik jaso zutela Elektroplaza sortzea. Ekitaldi honekin musika kalera eramateaz gain, DJ ikastaroak ere antolatu dituzte.
Musika entzuteko gogoz dagoenak hiru musika pintxadarekin egingo du topo. Almuedo eta Jota irundarrek emango diote hasiera jaialdiari eta 80. eta 90. hamarkadako house estiloak eta house, tech house, minimal eta UK garage ukituen fusioa ekarriko dituzte, hurrenez hurren. Segidan, Sweely musikari frantziar-estatubatuarrak bere estilo aniztasuna eskainiko du: rock, hip-hop eta jazz nahasketa.
Azkenik, Alemaniako hiri Munichetik Tini musika jartzailea igoko da oholtzara. Bere estiloari erreparatuta, oinarrizko house eta techno underground musikaren munduan dabil, festibaletan eta klub txikietan. Oro h ar, askotariko estilo elektronikoak fusionatzen ditu.
Musika jartzen ikasteko ikastaroa Telmo Trenor donostiarrak eskainiko du hilaren 5, 22 eta 29an eta apirilaren 5ean. Martindozenean izango dira saio hauek, 11:00etatik 13:00etara eta izena eman beharra dago parte hartzeko, hilaren 12a baino lehen. Ikastaro hau 16 eta 25 urte bitartekoei begirakoa da.
Egitaraua
- 17:00etan: Almuedo B2B Jota.
- 18:00etan: Sweely.
- 20:00etan: Tini.
