BATeko ordezkariek asteburu bikaina izan dute
Asteburu honetan 18 urte azpiko Espainiako Txapelketa, Jaurtiketa luzeen Espainiako Txapelketa, Espainiako Master Txapelketa eta 16 urte azpiko Gipuzkoako Txapelketa jokatu dira.
Asteburu honetan hainbat txapelketa jokatu dira —18 urte azpiko Espainiako Txapelketa, Jaurtiketa luzeen Espainiako Txapelketa, Espainiako Master Txapelketa eta 16 urte azpiko Gipuzkoako Txapelketa—, eta BATeko ordezkariak bikain aritu dira horietan.
Valentziako Luis Puig velodromo jauregian jokatu zen 18 urte azpiko Short Track Espainiako Txapelketa. Bidasoa Atletiko Taldeko sei atleta lehiatu ziren bertan. Finalista postu bat, marka pertsonal ugari eta kontent egoteko moduko lasterketak egin zituzten.
- Imanol Ibarbia: 6. postua pertika jauzian. 4,15 metro gainditu zituen, haren emaitzarik onena orain arte.
- Jon Gajate: 8. postua (finalista) 60 metro hesietan. Finalerdietan haren inoizko markarik onena lortu zuen, kronoa 8,23 segundoan geldituz.
- Lucas Cabezon: 9. postua 3.000 metroetan. 8. postuan amaitzeko asko borrokatu ondoren 9. helmugaratu zen. 8:49 minutu egin zituen.
- Markel Garrantxo: 10. postua 400 metroetan. Finalerdietan haren marka onena lortu zuen arren fotofinish-ean egondako errore baten ondorioz proba errepikatu behar izan zuten, eta errepikapenean 50,70ko denbora egitea lortu zuen.
- Alai Cabello eta Julen Mendoza: 20. postuan bukatu zuten. Cabello 800 metroko proban lehiatu zen eta 1:59ko denbora egin zuen. Klubaren arabera lasterketa zaila egokitu zitzaion. Mendoza, berriz, 1.500 metroko proban aritu zen eta 4:16ko denborarekin 20. denbora onena lortu zuen.
Jaurtiketa luzeen Espainiako Txapelketan zoratzeko errendimendua izan zuten BATeko altetek. Castellongo Gaeta Huguet instalakuntzetan eta Jaume I Unibertsitatean aritu ziren Alejandro Esteban, Bruno Cagigos, Marta Mancebo eta Lissette Arreaga.
- Alejandro Esteban: 20 urte azpiko txapeldunorde xabalina jaurtiketan. Xabalina 64,86 jaurtitzea lortu zuen Estebanek, maila oso altua izan zuen lehiaketa batean. Asteburuan absolutu mailan lehiatu zen ere eta 67,93 metroko jaurtiketarekin klubeko errekorra egin zuen, baita haren markarik onena ere.
- Bruno Cagigos: 3. postua 23 urte azpiko disko jaurtiketan. 48,38 metroko jaurtiketa egin zuen, haren markarik onena eta klubeko errekorra.
- Marta Mancebo: 4. postua absolutu mailako xabalina jaurtiketan. 41,60 metroko jaurtiketa egin zuen Mancebok, hirugarren sailkatuak baino 3cm gutxiago soilik.
- Lissette Arreaga: 9. postua absolutu mailako mailu jaurtiketan. 48,28 metrora jaurti zuen mailua.
Espainiako Master Txapelketa Antequeran (Malaga) jokatu zen, eta bertan izan ziren Imanol Gil eta Susana Ruiz atletak.
- Imanol Gil: 35 urte azpiko kategorian parte hartu zuen eta txapeldun izendatzea lortu zuen 60 metroetan (7,01 segundo). 200 metroetan ere sekulako emaitza eskuratu zuen, 23,05eko denborarekin txapeldunorde izan baitzen.
- Susana Ruiz: 50 urte azpiko kategorian lehiatu zen. 400 metroko proban 6. izan zen 1:08,73ko denborarekin. 800 metroetan, berriz, 7. izan zen. 2.50,28ko denborarekin.
Larunbatean, Donostiako Velodromoan, 16 urte azpiko Gipuzkoako Short Trak Txapelketak jokatu ziren. Guztira 7 domina eskuratu zituzten BATeko kirolariek. Klubaren esanetan, harrobiak etengabeko progresioa erakusten du.
- Jon Andiano eta Naia Piquer: Gipuzkoako txapeldunak izan ziren biak ala biak. Andiano 60 metro hesietan lehiatu zen eta haren denborarik onena egitea lortu zuen (9,08 segundo). Piquer aldiz, 600 metroetan lehiatu zen eta haren markarik onena egitea lortu zuen ere (1:48,78 minutu).
- Eider Aranburu: Gipuzkoako txapeldunorde 1.000 metroko proban. 3:14ko denborarekin, haren denborarik onena egitea lortu zuen.
- Kaiet Arruabarrena: Gipuzkoako txapeldunorde 1.000 metroetan. 2:57ko denboran gelditu zuen kronoa.
- Telmo Nausia: Brontzezko domina eskuratu zuen 1.000 metroetan (3:03 minutu).
- Izaro Romero: Jauzi hirukoitzan eta altuera jauzian lehiatu zen eta bietan brontzea zintzilikatu zuen. Jauzi hirukoitzan 9,77 metroko saltoa egin zuen eta altuera jauzian 1,45 metro gainditzea lortu zuen. Azken hau haren markarik onena da.
