Real Union ibilbideko pantalana berrituko dute
Pantalana handitu eta konpondu egingo dute. Era berean, pantalanaren inguruko lohia garbituko dute, ponpaketa bidez.
Real Union ibilbidean dagoen pantalana konpondu eta handituko duela jakinarazi du Irungo Udalak. Hain zuzen, Santiagotarrak elkartearen aurrean dago. Horrez gain, pantalanaren inguruko lohia kenduko dute ponpaketa bidez. Bi jarduketen kostua 250.000 eurotik gorakoa da.
Azken esku hartzea duela bederatzi urte egin zuten eta ibaiadarreko itsasaldien ondorioz pantalanaren inguruan jalkinak berriz metatu direla adierazi du udalak. Ondorioz, pantalana hondartuta geratzen da itsasbeheran, enborrak eta adarrak pilatu dira haren azpia. Zingoa txikitu egin da horrenbestez eta piraguismo eta arraun jarduerak asko mugatu dira.
Pantalana desmuntatuko dute, pantalanaren zortzi moduluak lehorreratu, garbitu eta konpondu gero margotzeko. Ponpaketa lanak 960 metro koadroko eremuan egingo dituzte. Behin lan horiek guztiak bukatuta, konpondutako eta bi modulu gehiagorekin handitutako pantalanaren egitura muntatuko dute, egungo kokalekua baino azpirago.
Borja Olazabal Kiroletako ordezkariak esan du obra hauek ekarriko duten hobekuntzak Santiagotarrak kirol elkarteak nabarituko dituela bereziki eta adierazi du azpiegitura “segurua” eta “eguneratua” behar dutela.
Gorka Alvarez Obrak, Mantentzea eta Azpiegituretako ordezkariak nabarmendu du kirol instalazioak kontserbatzeko “beharrezko esku hartzea” dela honakoa eta “aldian-aldian” egin behar dela azaldu du.
