Euskaraldiko Herri Batzordea osatu dute hondarribiarrek
Lehen bileran aurtengo edizioaren xehetasunak aztertu eta herri mailako egitasmoetan sakondu dute. Hurrengo hitzordua hilaren 18an izango da.
Hogei norbanako baino gehiago elkartu ziren joan den astean Euskaraldiko Batzordea osatzeko hitzorduan, eta bertan, aurtengo edizioaren xehetasunak aztertzean gain, herri mailan egingo dituzten egitasmoak lantzen hasteko aukera izan zuten. Bilera amaituta, beraz, Hondarribiak “ofizialki” jarri du martxan Euskaraldia, eta sortutako batzordeak izango du Hondarribiko bizilagunei Euskaraldiaren helburuen berri eman eta jarduerak antolatzeko ardura.
Bide horretan, dagoeneko lehen pausoak emateko prest da batzordea. Herritar guztiei luzatu die horretarako deia, eta nahi duen orok bidal dezake egitasmoa definituko duen leloa helbide honetara. Lantaldearen hurrengo saio irekian hautatuko dute esaldi irabazlea.
Horretaz guztiaz gain, Euskaraldia bera eta euskararen erabilera zabaltzeko herriko auzo guztietan ekimen informatiboak egingo dituzte, eta taldeak osatu behar dituzte horretarako. Aipatutako ekimen horien helburua norbanakoak eta entitateak Euskaraldian parte hartzera gonbidatzea da. Hots, norbanakoen izen ematea martxoaren 15etik maiatzera bitartean izango da; entitateena, berriz, apirilera arte egongo da zabalik.
Euskaraldiko lehen erronkak finkatuta, horietan lanean hasi eta lantaldeak osatzeko bilera deitu dute. Hilaren 18an izango da, 18:30ean, udaletxeko Areto Nagusian.
