Kasino Zaharreko taberna zabaldu dute
Gaurtik aurrera martxan izango da Kasino Zaharreko taberna. Maria Amada Sagarzazuk ustiatuko du, eta, asteazkenetan izan ezik, gainontzeko egunetan zabalik izango da, 09:30etik 20:30ak arte.

Herritarrek, eta batez ere Kasino Zaharreko erabiltzaileek aspaldi amesten zuten eguna iritsi da azkenean. Gaur goizean ireki dira berriz ere Kasino Zaharreko tabernaren ateak, goizeko 09:30ean, eta 11:00etarako jendez lepo zegoen establezimendua. “Aiton-amonek merezi zuten” esan du Maria Amada Sagarzazu tabernariak. Ilusio handiz heldu dio establezimendua ustiatzeko erronkari. Goizeko 09:30etik iluntzeko 20:30ak arte zabalduko du egunero taberna, asteazkenetan izan ezik. Gaurtik aurrera “herri guztia” gerturatzea espero du.
Josu Peña zinegotzia ere oso pozik agertu da irekieraren aurkezpenean, zahartze aktiborako “oso beharrezkoa delako”. Udaletxera sartu zirenetik taberna martxan jartzea “beharrezkotzat” jo zutela nabarmendu du zinegotziak, baina aurreko lizitazioa egiterik izan ez zutela. “Buru belarri jarri ginen eta kostatu da, baina iritsi da eguna”. Herritar guztiei irekita egongo den espazioa dela gaineratu du, era horretan “saretze lana” eta “elkarrekiko zaintza” gauzatuko delako.
Bost urte ondoren, zabalik
Duela bost urte itxi zuten Kasino Zaharra, pandemiaren eraginez. Eta hilabeteak aurrera egin ahala inguruko dendak, komertzioak eta eraikinak zabaltzen joan ziren arren, Kasino Zaharra irekitzeko zailtasunak izan zituzten aurreko agintariek (EAJ zegoen orduan). Egokitzapen lanak egin, baimenak eskatu eta 2022ko urriaren 24an ireki zuten eraikina. Taberna zerbitzuak, ordea, itxita jarraitu du gaur arte.
Herriko erretiratuen elkarteko kide den Txomin Aristondok elkartekideen izenean hartu du hitza irekiera aurkezpenean, eta “oso kontent” daudela adierazi du, tabernak “bizi gehiago” emango baitio Kasino Zaharrari. “Uste dugu udalari ez diogula presio asko sartu, pausoak ematen ari zela ikusten genuelako. Orduan itxoin egin dugu”, esan du elkartekideak. Dena den, bitarte horretan, 2023 eta 2024 urte artean, lelkarteak lan asko egin dutela gaineratu du Aristondok: “Kurtso asko jarri ditugu martxan, 200 pertsona baino gehiagorentzat. Ez gara lo geratu”.
Irribarre zabalarekin, txanpain kopak eskuan, tabernaren irekiera gogotik ospatu dute.