Herritarrekin osatuko du hiri hondakinen ordenantza Txinzerrek
Hiri Hondakinen Kudeaketarako Ordenantza eguneratzen ari da Txinzer, 2001etik dagoen ordenantza ordezkatuz. Atzo aurkeztu zuten testua jendaurrean, eta hurrengo egunetan alegazio edota proposamenak egiteko aukera dago.
Txingudiko Zerbitzuak-ek 2001etik indarrean dagoen ordenantza ordezkatu eta Hiri Hondakinen Kudeaketarako Ordenantza berria onartu du behin-behinean.
Hondakin eta Lurzoru Kutsatuei buruzko 7/2022 legea edo Ontzien eta Ontzi Hondakinen kudeaketari buruzko 1055/2022 Errege dekretuaren gisako Estatuko legedia bermatzen du ordenantzak. Baina, haratago doa, “hondakinen kudeaketa eraginkorragoa, jasangarriagoa eta birziklapenarekin konprometituagoa” lortzeko asmoa baitu, eta norabide horretan, Espainiako Ekonomia Zirkularreko Estrategia eta 2021-2023 Ekintza Planaren printzipioak bere egin ditu.
Leire Zubitur Txinzerreko kudeatzaileak adierazi duenez, azken urteetan zerbitzuetan aldaketak egon dira, “orain, lehen existitzen ez ziren zerbitzuak” arautu ditzakete. “Helburu nagusia da lege-araudiak betetzea, birziklapena erraztea eta eskualdeko ingurumen-inpaktua murriztea”.
Hiru atal nagusi ditu ordenantzak. Lehen atalak, araubide juridikoa eta lege-definizioa jasotzen du. Bigarrenak, eskaintzen diren bilketa-zerbitzuak eta erabiltzaileek dituzten betebeharrak jasotzen ditu, industrialdeetako bilketa eta garbiguneak erabiltzeko arauetan sakonduz. Azken atala, “ordenantza betetzen dela ikuskatzeko eta kontrolatzeko” dauden zehapen mota eta prozedurei buruzkoa da.
Erabiltzaile guztiek eremu guztietan hondakinak bereizi ahal izateko zerbitzu mota ezberdinak eskaintzeari ekingo diote: “etxeetan, ostalaritzan eta merkataritzan, industrian, jende asko biltzen duten ekitaldi publikoetan, etab”. Ordenantzan gehitutako berrikuntza oro “jasangarritasunarekin duten konpromisoarekin eta birziklapen-helburuak betetzearekin bat datoz”.
Gainera, ordenantzaren prestaketa herritarren partaidetzarekin osatuko da. Izan ere, Irungo alkate den Cristina Labordak argitu du “testuak eskualdeko beharrak islatu zitzan nahi” zutela. “22 urteren ostean, araudia eguneratzea” ez da egin duten urrats bakarra, garrantzitsuena ordenantza osatzeko modua iruditu zaio: “eragile, auzokide, herritarrak entzunez”.
Igor Enparan Hondarribiko alkateak azpimarratu du Txingudi eskualdeak ekonomia zirkular eta ingurune naturalarekin konpromisoa duela. Kudeaketa jasangarriago eta eraginkorragoa eskuratzeko hainbat zerbitzu proposatuko dituzte, besteak beste, garbiguneak eta biohondakinen gaikako bilketa.
Atzo, hilaren 4an, jarri zuten behin-behineko testua Txinzerren webgunean, eta argitaratze datatik aurrera 30 eguneko epea ireki dute dokumentuari alegazioak edota proposamenak aurkezteko. Horretarako lehen bidea Txingudiko Zerbitzuen Mankomunitateko Erregistro Orokorrera aurkeztea da, aldez aurretik hitzordua hartuz. Administrazio Publikoen Administrazio Prozedura Erkidearen Legearen 16.artikuluan ezarritako puntuen bidez ere aurkeztu daitezke. Azkenik, Txinzerren webguneko formularioaren bidez ere aurkeztu daiteke alegazioak.
