Sutea izan da Hondartza Kiroldegiko sauna eremuan
Gorputz Tratamenduaren gunea eta igerilekua izan ezik, gainontzeko instalakuntzak ohiko ordutegian ireki dituztela jakinarazi du udalak.
Hondarribiko Udalak jakitera eman duenez, atzo arratsaldeko lehen orduan sute bat piztu zen Hondartza Kiroldegiko sauna eremuan.
Suhiltzaileak, Hondarribiko Udaltzaingoa eta Ertzaintza gertakarien lekura gerturatu ziren, eta sutea “erabat kontrolatuta” geratu zen. Alabaina, segurtasun eta ziurtasunagatik kiroldegi osoa hustu zuten, baina gehitu zuten ez zela inolako kalte pertsonalik izan.
Handik ordu batzuetara, udalak, emandako informazioa eguneratu zuen, eta zehaztu zuen sutearen eremuan zein kiroldegian egin beharreko azterketa guztiak egin zituztela, eta hortaz Gorputz Tratamenduaren gunea eta igerilekua izan ezik, instalakuntzaren gainontzeko eremuak normaltasunez irekiko dituztela gaur.
Ondoko irudiak Hondarribiko Udalak Instagramen zabaldu dituenak dira.
