Emakumearen Nazioarteko Eguna iragartzeko lehiaketa, zabalik
Kartel irabazleak Emakumeen Nazioarteko Egunarekin lotura zuzena izan behar du.
Iazko kartel irabazlea. Hondarribiko Udaleko Berdintasun sailak Emeki elkartearekin batera antolatu du beste urte batez Emakumearen Nazioarteko Eguna iragartzeko zein haren inguruan sortuko diren ekintza guztien kartela hautatzeko lehiaketa.
Lanak bidaltzeko epea atzo zabaldu zuten eta parte hartu nahi dutenek hamar egun izango dituzte lanak bidaltzeko, otsailaren 8ra arte.
Kartelak, ezinbestean, Emakumeen Nazioarteko Egunarekin lotura zuzena eta 2025eko Martxoaren 8a Emakumeen Nazioarteko Eguna leloa izan behar du.
Oinarriak
Lanak edozein teknikarekin sortu daitezke. Hori bai, kalitate handiko formatua behar dute izan: TIFF, PNG, JPG edo PDF formatuetan, ondoren inprimatu ahal izateko.
Lehiakide bakoitzak lan bakarra entregatu ahal izango du, eta ezinbestekoa izango da lan originalak eta aldez aurretik argitaratu gabekoak izatea. Kartel irabazlea udalaren jabetzakoa izango da eta argitaratzeko zein zabaltzeko eskubideak izango ditu.
Aurkeztutako lanekin erakusketa bat egingo dute. Hondarribiko Arma Plaza Fundazioan ezarriko dituzte, martxoaren 5etik 11ra, eraikinaren lehen solairuan.
