EAJ: "Udal kudeaketa ez da lan erraza"
Astelehen honetan Abotsanitzek etxebizitzaren erronkari eutsi eta "legea betetzera mugatzeko" konpromisoa hartu zuen. Jeltzaleek orain artean legea bete ez delaren akusazioa "oso larritzat" jo dute.
Presa I eremuan eraikitzen ari dira 60 etxebizitza publikoak. Hondarribiko jeltzaleak kezkatuta agertu dira etxebizitza berrien eraikuntzarekin, HAPO onartzeko izapideak 20 hilabeteetan “geldituta” egon direla diotenez, etxebizitza berrien eraikuntzak “atzeratu” egingo direla uste baitute.
2023-2027 legegintzaldia aurrera doa eta jeltzaleen ustez gobernukideak “jabetzen hasiak dira” oposizioan urteetan agindutako guztia ezin izango dela gauzatu. Egoera honen aurrean, udal kudeaketa dirudiena baino lan zailagoa dela onartu dute: “Udalaren kudeaketa ez da lan erraza, nahiz eta oposiziotik urteetan zabaldu ziren mezu populistek kontrakoa pentsarazi ahal izan zioten pertsona askori”.
Etxebizitzaren inguruan hartu ziren erabaki garrantzitsuenak 2023an hartu zirela esan dute ere: “60 etxebizitza publiko alokairu erregimenean eraikitzeko akordioa Visesarekin eta eraikitzeko obra lizentzia izapidetzea, eta etxebizitza turistikoetan lizentzia berriak bi urtez etetea”.
Jeltzaleek etxebizitzen inguruan hitz egitea ez da kasualitatea. Astelehen honetan bertan iragarri zuen Abotsanitzek 2025-2026 urtean etxebizitzaren erronkari helduko diola. Bertan legea alde dutela baieztatu eta datozen hilabeteetan hura betetzera mugatzeko konpromisoa hartu zutela adierazi zuten.
Jeltzaleek gogor erantzun diete adierazpen horiei: “Orain arte ez dela bete esan nahi duzue? Norbaitek uste badu norbait legearen gainetik pasatu dela argi eta garbi esateko noiz eta nola izan den. Horrelako akusazio ideiak inolako ziurtasunik gabe botatze oso ariketa arriskutsua da eta herritarrak erakundeetatik urrundu besterik ez du egiten”. Ziurtatu dutenez, egungo udal gobernuak aholkulari juridikoak kontratatzeko inoiz baino diru publiko gehien erabili dute, eta arrazoi horrengatik akusazio horiek “askoz ere larriagoak” iruditu zaizkie.
Abotsanitz ez dela soilik herritarren plataforma bat adierazi dute azkenik jeltzaleek: “Orain gobernuko alderdia dira eta arduratsuagoak izan beharko lukete beren adierazpenekin eta gobernu betebeharrak betetzearekin”.
