2025-2026an etxebizitzaren erronkari helduko dio Abotsanitzek
Abotsanitz Herri Plataformak etxebizitza identifikatu du 2025-2026 urteko erronka nagusi gisa. Aurreratu dutenez aurki hasiko dira lehen aldaketak somatzen. Lehena HAPOren behin-behineko onarpena izango da.
Etxebizitzaren afera arazo jakina da gizartean. Etxebizitza duin bat erosteko, alokairuan sartzeko edo emantzipatzeko arazo handiak dituzte gazte, heldu eta zaharrek, eta Hondarribian ere “kezka arrazoi” nagusiena izatera heldu da. Urte politikoa hasi berri den honetan, ohar baten bidez, 2025-2026an etxebizitza arazoari irtenbideak emateko erronkari helduko diola iragarri du Abotsanitzek.
“Eskaria eta eskaintzaren arteko desoreka izugarria dugu herrian, eta eskaintzan dauden etxebizitzen prezioak desorbitatuak daude erabat”, diote, “Hondarribiarrak herritik kanpo joatera behartuz”. Egoera horretara iristea ekidin zitekeela uste dute plataformako kideek. Nola? Bada, etxebizitza publikoak sustatzen eta herritarren interesak lehenesten lobbyen gainetik. Baina azken hamarkadetan egin diren etxebizitza politikek etxebizitza pribatuak lehenetsi eta etxebizitza publikoak bigarren edo hirugarren maila batera “kondenatu” dituztela adierazi dute.
Erabaki politiko horiek salatze aldera, azken hamar urteetan Hondarribian bizitzeko eskubidea aldarrikatzen aritu da Abotsanitz, Hondarribian Bizi Nahi Dugu kanpainaren bitartez. Gobernura heldu zirenean, HAPO “eraldatzea” erabaki zuten eta ordutik lanketa prozesu batean murgilduta izan dira.
Dena den, azken 30 urteetan Hondarribian aplikatu den “hiri eredu neoliberala” errotik aldatzeko “formula magikorik” ez dutela argi utzi nahi izan dute.
Aldaketak aurton
Formula magikorik ez, baina legea alde dutela baieztatu dute, eta datozen hilabeteetan hura betetzera mugatzeko konpromisoa hartu dute. Lehen pausoa HAPOren behin behineko onarpena izango da.
2027rako Abotsanitzen gobernuan lehen etxebizitzak eraikita ikustea “zaila” izango dela aurreratu badute ere, etxebizitzak eraikitzeko “joko arauak” indarrean utziko dituztela helarazi dute, hau da, “tokian tokiko etxebizitza publiko eta pribatu portzentaia %40/%60 edota %75/%25 eraiki beharko dute promozio pribatu guztietan”.
Hortaz gain, udalean Etxebizitza saila sortuko dutela iragarri dute ere, eta bertatik kudeatuko dituzte udalak bere gain izango dituen Etxebizitza publikoak, zeinetan Hondarribian jaio edota bizi direnak lehenetsiko diren.
Hirigintzara bideratutako gaien emaitzak ikustea zaila gerta daitekeen arren, Hondarribian bizi ahal izateko “bide onean goazela” sinistuta daude.
