Aukerarik gabeko jardunaldia Biok Txingudirentzat
Ligako txapeldunak jaso zituzten etxean eta ez zien inolako aukerarik utzi Plaiaundikoei. 16 urtez azpikoak, berriz, garaipenarekin itzuli dira.
Etxean jokatu zuen pasa den asteburuan Biok Txingudik Uni Bilboren kontra, baina bizkaitarrek guztiz menderatu zuten norgehiagoka. Bilbotarrak ligako txapeldunak dira eta denboraldi honetan ez dute partida bat bera ere galdu.
Zailtasunak zailtasun, lasaitasunarekin jokatu nahi zuten Plaiaundikoek eta entrenamenduetan ikasitako guztia aplikatu, gauza berriak probatu ahal izateko. Baina, asmo horrek, bisitariek iniziatiba edukitzeko balio izan zuen, lehen minututik. Izan ere, hasieratik Bilbok baloia kontrolpean izan zuen, jokoaren fase guztiak menperatuz.
Lehenengo zatian, bederatzi entsegu eraldatu lortu zituzten bizkaitarrek eta 0 eta 63ko abantailarekin iritsi ziren atsedenaldira. Bigarren zatian, berriz, txipa aldatu zuten jokalariek, argi izan baitzuten hasierako planteamendua maila honetako aurkari baten kontra ez zela egokia.
Erabaki aldaketarekin, defentsaren antolakuntzak hobera egin zuen eta Uni Bilbok aukera gutxiago izan zituen aurrera egiteko. Lau entsegu eta bi eraldaketa gehiagok amaierako 0 eta 87a ipini zuten markagailuan. Datorren astean, Txingudik beste norgehiagoka zaila izango du, oraingoan, Durangoren aurka Plaiaunditik urrun.
Biok Txingudiko honako jokalari hauek zelairatu ziren: Lucia Duran, Lupe Pescador, Maren Santa Cruz, Zumendi Caro, Maddi Garmendia, Lohitzun Aia, Miren Fernandez, Lea Etxebarrieta (kapitaina), Enara Arruti, Alba Saiz, Irati Beraiz, Garazi Santos, Paola Vega, Ane Novo eta Leire Muñoz. Aulkian, berriz, Haizea Rodriguez eta Maddalen Alberdik hasi ziren.
16 urtez azpikoak, irabazle
16 urtez azpiko Txingudi/Baztanek Lasarte-Orian jokatu zuen larunbat goizean Zarautz/Beltzaken aurka. Norgehiagoka uste baino erosoagoa izan zen gazteentzat, baina etxekoek ez zuten amore eman hain erraz. 19 eta 56ko markagailuarekin, ligako bigarren fasean garrantzitsua izango den garaipena eskuratu dute beltz eta zuriek.
