Txingudiko Pentsiodunak manifestatu egin dira pentsioen izozteen kontra
21/2021 Legean otsailerako ezarritako pentsioen igoera bertan behera geratu da Espainiako Kongresuak lege-dekretua ostiralean indargabetu ondoren.
Hilabeteko azken astelehena denez, manifestazioa egin dute Irungo kaleetatik Txingudiko Pentsiodunek. “Sumindura” erakutsi dute, abenduan onartutako lege dekretua pasa den hilaren 23an Espainiako Kongresuan indargabetu egin dutelako eta beraz, lege honek ez duelako igoerarik ekarriko pentsioetan.
Era horretan, 2018ra atzera buelta egin dela salatu dute pentsiodunek Bidasoan eta “engainatu” egin dituztela azaldu dute. Hasiera baetan, KPIaren arabera handitzea erabaki zenean engainatu zituztela oroitu dute, eta orain, “merkantzia politiko” gisa pentsioak salerosi eta saldu behar dituztelako.
Pentsioen igoera eragotzi duten PP, VOX eta Junts Per Cat alderdiak seinalatu dituzte, baita Espainiako gobernua ere. Azken erakunde honek ez du bermatu pentsioen igoera gauzatzeko beharrezkoak diren botoak eta prozedurak, pentsiodunen mugimenduaren arabera.
Arrazoi “alderdikoiak” daudela hilaren 23ko erabakiaren atzean uste dute eta adarra jotzen ari dietela ozen salatu dute. “Pentsioen igoera bermatu egin behar zen, bai edo bai, eta ekintza politikoaren oinarri gisa pertsonen beharrak baloratzen dituen inork ezin du urteko balioa handitzea eragotzi”.
Orain arte lortutakoa asko kostatu zaiela adierazi dute eta ohartarazi dute ez dutela atzerapauso bakar bat ere onartuko. Bide horretan, pentsioak igotzeko, pentsiodun ororen babesaren beharra azaldu dute, hurrengo hilabeteei nahiz urteei begira.
