Asteburuan hitzordu bikoitza errugbian
Biok Txingudik Euskadiko Txapeldunaren bisita jasoko du asteburu honetan Plaiaundin eta 16 urte azpiko errugbilariek Lasarte-Orian jokatuko dute.

Denboraldiko partidarik “zailenetakoa” izango dute bidasoarrek asteburuan. Universitario Bilbao taldearen bisita jasoko du Biok Txingudi taldeak etxeko instalazioetan. Partida larunbatean jokatuko da partida, 16:00etatik aurrera. Euskal ligako liderrak dira bilbotarrak, eta pasa den denboraldiko txapeldunak.
Iragan astean Gasteizen izan zuten azken norgehiagoka, eta hura ere ez zen partidu samurra izan. Aste honetan ikusiko da partidu horrek ondorio negatiboak izango dituen ala ez; izan ere, aste honetan hainbat jokalari botako dituzte faltan etxekoek. Dena den, paperean indartsuagoak diren taldeei aurre egiteko gaitasuna badutela adierazi dute klubetik. Horren adibide jarri dituzte Durango edo Neskak Loratzen taldeen kontra jokatutako partidak.
16 urte azpiko errugbilariek ere erronka gogorra izango dute larunbatean. Lasarte-Oriako Mitxelin zelaian jokatuko dute Zarauzko Beltzak taldearen kontra. Partida 09:45ean hasiko da. Aurkariek baino puntu bat gutxiago dute bidasoarrek. Une honetan bosgarrenak dira sailkapen orokorrean, bi garaipen eta porrot bat pilatuta.
Selekzioen deialdiak
Gipuzkoako eta Euskadiko selekzioen deialdi berriak jaso dituzte klubeko 13 eta 14 urte azpiko 11 errugbilarik. Markel Aizpurua, Aiur Callao, Telmo Bereciartua, Markel Celestino, Oier Goenaga, Oihan Sanchez, Beñat Tristan, Unai Aizpurua, Giovani Ciurar, Galder Eizagirre eta Omar El Mossaoui dira hautatzaileak deitu dituenak. Asteburu honetan Errenteriako Mikel Odriozola estadioan egingo dituzten entrenamenduetan parte hartuko dute.
Astelehenean, berriz, 16 urte azpiko jokalariak bilduko dira eta bertan izango da klubeko Mattin Petrikorena. Euskadiko selekzioak Durangon egingo du entrenamendua Autonomien arteko txapelketan Madrilgo Erkidegoaren aurkako partida prestatzeko.