Hilda aurkitu dute atzo Saioa mendian desagertu zen mendizale hondarribiarra
Atzo, 18:30ean, SOS Deiak Nafarroak-ek jasotako dei batek hasi zuen bilaketa, eta gaur 10:30 inguruan aurkitu dute 59 urteko mendizalearen gorpua gailurrean.
OLYMPUS DIGITAL CAMERA Atzo desagertutako 59 urteko hondarribiar mendizalearen gorpua aurkitu dute Nafarroako Saioa mendiaren gailurrean. Suhiltzaileek, basozainek, guardia zibilek eta foruzainek osatutako erreskate talde batek bideratu du bilaketa, atzo 18:30ean mendizalea desagertu moduan identifikatu ondoren.
Belateko benta inguruan hasi zen mendizalearen ibilbidea, 11:00etan. Beranduago, 18:30ean, SOS Deiak Nafarroak dei bat jaso zuen, gizonaren desagerpenaren berri emanez. Hor bertan, erreskate taldeak Saioara hurbiltzen hasi ziren, lau taldetan banatuta. Iluntasunak behartuta, gau osoan zehar soilik lurreko bilaketa egin dute. Gaur, berriro ere 08:30ean hasi da bilaketa, helikopteroaren laguntzarekin, eta goiza aurrera ahala, guardia zibila eta foruzainen erreskate txakurrak gehitu dira bertara.
Atzo, 20:22ean mendizalearen autoa aurkitu zuten, bere ibilaldiaren abiapuntuan, Belateko bentaren inguruetan. Ondoren, 23:35ean, bere sakelako telefonoa aurkitu zuten.
EFE agentziaren arabera Foruzaingoak adierazi du heriotza naturala izan dela, ez baita traumatismorik ezta ere erori izanaren ikurrik antzeman.
