Eider Bengoetxeak hartu du Ola sagardotegiaren lekukoa
Hogei eta bosgarren txotx ekitaldia egin zen atzo Ola sagardotegian, eta belaunaldi berri baten eguna izan zen.
1999. urtean ireki zituen ateak Ola sagardotegiak Meaka auzoan, Aiako Harriaren babes pean. Ordutik, hogei eta bost txotx irekiera egin dituzte eta atzo egin zuten aurtengoa.
Familia arteko kutsua eman diote aurtengo txotx irekierari. Batetik, aurtengo omendua Xabier Martiarena Bengoetxea, familiako kidea eta sega munduan Bengoetxea II izenez ezaguna izan zen; bestetik, Eider Bengoetxea izan zen eguneko protagonista handia, egun sagardotegiaren nagusi den Iñaki Bengoetxearen alaba.
Izan ere, sagardotegiaren giltza pasa zion Bengoetxea aitak alabari, eta haren “esku onetan” utzi du sagardotegiaren etorkizuna. Egun handiek eskatzen duten bezala, pantaila handi baten bidez jarraitu ahal izan zuten bertaratu zirenek errelebo egitea. 2025ko ekitaldian ere ez zuten huts egin Anjel Peñagarikano eta Aitor Mendiluze bertsolariek.
Eguna, baina, kanpoko pilotalekuan hasi zen, bertan jarri zuten karpa batean. Herri kirolez gozatu zuten goizean gerturatu zirenek, baita punta-puntako trikiti eta pandero joleen soinuez ere. Hauek, gainera, bazkaria bukatzean berriro ekin zioten erromeriari, hainbat gurasok Biriatuko ikastolaren aldeko taloak kozinatzen zituzten bitartean.
