'Berriz San Francisco' ontziak bi hilabete daramatza Dakarren arrantzatu ezin
Euskal Herriko lau atunontzi dira arrantza egin ezinda daudenak. Arazoa ez da epe laburrean konpontzea espero.
Euskal Herriko lau atunontzi, Bermeoko bi (Pilar Torre eta Corona del Mar), Hondarribiko bat (Berriz San Francisco) eta Getariako bat (Iribar Zulaika), arrantza egin ezinda daude Senegalgo Dakarreko portu batean.
Duela bi hilabetetik daude lotuta, Europar Batasunak ez duelako Europaren eta Senegalen arteko arrantza akordioa berritu nahi izan. Berria egunkariaren arabera, arrazoia da Afrikako herrialdeak ez duela nahikoa egiten legez kanpoko arrantzaren aurka.
Azaroaren 17an indargabetu zen akordioa eta harrezkero arrantza egin ezinda beren barkuetan bizi dira zenbait arrantzale, mantenu lanak egiteko eta lapurretak saihesteko. Bitartean galera ekonomiko handiak pilatzen dihardute arrantzaleek.
Arazoa ez da epe laburrean konpontzea espero, hala esan zuen Espainiako Nekazaritza eta Arrantza ministroak iragan azaroan, Berriak jakinarazi duenez.
Irakurri Berriako albistea.
