Jai giroan bukatuko dute urtea Hondarribiarrek
2024ko San Silvestrea aurkeztu dute gaur goizen. Aurten Afagi elkartea izango da lasterketa solidarioaren onuraduna. Dagoeneko 1.500 pertsonek eman dute izena.
Sport Mundi elkarteak antolatzen duen San Silvestre lasterketa aurkeztu dute gaur goizean. Lasterketa berezia dela adierazi du Lupe Queiruga zinegotziak, bi arrazoirengatik: “Alde batetik, jai giroan ospatzen delako eta, bestetik, lortutako diru ekarpenak elkarte bati emango zaizkiolako. Afagi elkartea izango da lasterketa solidarioak jasoko duen diru guztiaren onuraduna.
Alzheimerra eta beste dementzia motak diagnostikatzen zaizkien pertsonentzako eta haien familientzako euskarri den elkartea da Afagi. Besteak beste, aholkularitza, formakuntza eta arreta eskaintzen die elkarteak. “Azken finean, familiek eta gaixoek behar duten babesa jasotzen dute” zehaztu du zinegotziak.
Aurtengo urtea berezia da, bere horretan, Sport Mundi elkartearentzat. 25 urte bete ditu eta urte hauetan guztietan 50 GKErekin baino gehiagorekin elkarlanean aritzeko aukera izan dutela nabarmendu du Juan Antonio Garcia elkartekideak. “Milioi bat euro baino gehiago eman ditugu mundu osoan zehar hainbat proiektu egiten lagunduz”. Otsailaren 8an ekitaldi berezi batekin ospatuko dituzte elkartearen zilarrezko ezteiak, Itsas Etxean.
XV. San Silvestrea
Aurtengo edizioa hamabosgarrena izango da. Honakoa ere “berezia” dela adierazi dute antolatzailek; izan ere, elkartearen helburua beti izan da elkartasuna sustatzea eta, “kirola eginez bada, hobe”.
Probaren ibilbidea betikoa izango da: 6 kilometro izango ditu eta ohi bezala San Pedro kaletik abiatu eta puntu berean helmugaratuko dira lasterkatiak. Dagoeneko 1500 parte hartzailek eman dute izena eta horietatik %40a emakumezkoak dira. Izen emateak kirol probak plataformaren bidez egin daitezke eta jakinarazi dutenez, 2.000 parte hartzaileetara heltzen direnean itxiko dituzte izen emateak.
Garciak beren kolaboratzaile guztiei (Kofradia, Amunarriz etxe agentzia, Salto System, Mitch English School, Transnatur, BM supermerkatuak, Aranburu aluminioak, Rural Kutxa, Pasquier, Urgo Laborategiak, Diario Vasco, Argitrans, Hondarribiko Udalari, bolondresei eta lasterketan parte hartzen duten guztiei) eskerrak emateko baliatu du aukera.
Afagi elkartea
Alzheimerra eta beste dementzia batzuk dituzten pertsonei eta haien senideen bizi kalitatea hobetzen laguntzeko helburua du Afagi elkarteak. Hala berretsi du Iñaki Olaldek, elkarteko lehendakariak.
Aurtengo San Silvestre solidarioaren protagonistak izango da elkartea eta hari ikusgarritasuna emateko aproposa izango dela ziurtatu du. “Altzeimerra eta gainerako dementziak nahiko estigmatizatuta daude, gorde egiten dira. 14.000 pertsonak dute gaixotasun kognitiboren baten diagnostikoa. Ez dago zensotuta, estimazioak dira, baina zifra gero eta altuagoa da. 2050 urterako kopurua 40.000 pertsonetakoa izatea aurreikusten da” adierazi du.
Beraz, kontzientzia hartzeko eta entitate guztiek elkarlanean aritzeko garaia dela uste du lehendakariak, “gaixotasuna duten eta etorkizunean izango duten pertsonen bizi kalitatea hobetzeko eta prebentzioan aurrerapausoak emateko”.
Bukatzeko, gaixotasun kognitiboa duten kideak dituzten familiak laguntza eskatzera animatu ditu Olaldek. “Gaixotasuna oso gogorra da bakardadean” ziurtatu du. Informazioa nahi duen orok 943 297 118 telefonora deitu edo helbide elektronikora idatzi dezake.
