Denboraldia hastera doa Santiagotarrakentzat
Bidasoaren jaitsiera egingo dute aulki mugikorreko arraunlariek, hilaren 14an. Gipuzkoako Ligako lehena izango da.
Asteburu honetan, hilak 14, Santiagotarraken banku mugikorreko taldeak denboraldia hasiko du. Hala, Gipuzkoako Ligako lehen jaitsiera egingo dute eta Bidasoa ibaian izango da, 13:00etan. Denboraldi honetan hiru aldiz jaitsiko dute Bidasoa ibaia; hilaren 28an eta urtarrilaren 12an izango dira hurrengo hitzorduak.
Erlojuaren kontrako probak izango dira. Haurrak eta kimuak Behobiako zubitik irtengo dira eta aireportuko paretan bukatuko dute, 4.000 metro osatuz. Aldiz, seniorrak eta jubenilak Punttatik irtengo dira eta aireportuko horman bukatuko dute ere, 6.000 metroko ibilbidea burutuz.
Orotara, Gipuzkoako 350 kirolari espero dituzte eta 100 ontzi baino gehiago. Irungo klubaren kasuan, 61 kirolari arituko dira lehian, 24 ontzirekin.
