Hondarribiko Euskal Azokak zabaldu ditu ateak
Goizeko 11:00etatik eguerdiko 14:00etara eta arratsaldeko 17:00etatik iluntzeko 20:00ak arte egongo da zabalik Arrantzale auzoko plazatxoan.
Gaur goizetik igandera bitarte izango da martxan Hondarribiko Euskal Azoka. 30. urteurrenean zazpi argitaletxeren liburuak, diskak, eta mahai jokoak erosteko aukera egongo da. Zehazki, Alberdania, Elkar, Erein, Ibaizabal, Pamiela, Susa eta Txalaparta argitaletxeenak. Produktu guztiak euskaraz izango dira eta liburuek %10eko beherapena izango dute.
Aldi berean, Oarso Bidasoko Hitza ere bertan izango da eta mahai zein pareta egutegiak eskaintzeaz gain, harpidedun egiteko aukera izango dute herritarrek. Gainera, harpidedun egiteagatik Errigoraren saski baten zozketan sartuko dira zuzenean.
Egitaraua
Azoka iraunkorraz gain datozen egunetarako hainbat jarduera gehigarri antolatu ditu udalak Blagan elkartearen laguntzarekin.
Gaur arratsaldean Manttalengo alaba ikuskizuna eskainiko dute Kultur Etxean, 19:30ean.
Bihar, Arantxa Urretabizkaiak aurkeztuko du 39. Bordari eta Satarka Literatur Lehiaketako lanen sari banaketa (Itsas Etxean, 18:30ean) eta ondoren, Gotzon Barandiaranek bere hirugarren poema liburuan eraikitako letrazko ikuskizuna egongo da (Itsas Etxean, 19:30ean).
Etzi, larunbata, liburu aurkezpenak, mural baten margoketa (BAZen parean) eta Olatz Salvadorren kontzertua egongo dira (Itsas Etxean, 19:30ean).
Eta igandean, azkenik, familientzako ipuin kontaketa, Lupe Calvo Elizazuren Pertsona izatearen balioa – Lourdes Ibañez de Gauna, gizarte-ekintzan aitzindaria liburuaren aurkezpena eta Patxi Bisquerten Ombuaren itzala luzemetrailarekin emango diote itxiera Euskal Azokari.
Bertaratu eta gozatu euskal kulturaz!
