Bisexualitatea eta euskal komunitatea hizpide
Bizi bisexualitatea proiektua aurkeztuko dute hilaren 16an Lumak Haizeren ekimenez. Emakumeen Etxean elkartuko dira eta June Fernandez kazetaria arituko da solasean.
Lumak Haize, Irungo LGTBIAQ+ elkarte feministak bisexualitatea eta euskal kulturaz hitz egiteko saio bat antolatu du hilaren 16rako, Emakumeen Etxean. “Zer behar dugu bisexualitatea identitate politiko bizigarriagoa eta gozagarriagoa izateko?” galdetu dute.
Bizi bisexualitatea proiektua aurkeztuko dute, helburu duena euskal kultura bisexualaren mapa osatzea erreportaje transmedia baten bidez. Euskarri honek indarkeriei, bisexualitateak euskal kulturan duen espazioari, lumari, erreferenteei eta bestelakoei buruzko hausnarketa egiteko balio du.
Hurrengo asteko solasaldi honetara June Fernandez kazetari eta Pikara aldizkariaren koordinatzailea gerturatuko da. Saioa euskaraz izango da eta 18:45ean ekingo diote. Aurreratu dute pertsona guztiak izango direla ongietorriak, baina ez jarrera guztiak.
