Abotsanitz Herri Plataforma "zoriondu" du EAJk
Ironiaz betetako oharra plazaratu du Hondarribiko EAJk. "Kontakizun bat eraikitzeko abileziaren" eta "udaletxearen egiteko modu berriaren inguruan eraikitako kontakizun bikainagatik" zoriondu dute herri plataforma.
Abotsanitz Herri Plataforma zoriondu nahi izan dute jeltzaleek, baina ez udalaren eguneroko kudeaketagatik edota proiektu berritzaileengatik, baizik eta plataformak duen “kontakizun bat eraikitzeko abileziaren” eta “udaletxearen egiteko modu berriaren inguruan eraikitako kontakizun bikainagatik” baizik.
Jeltzaleen iritziz herritar asko “konbentzitu” zituzten udalerriak zituen arazo guztiak konponduko zituztela, baina orain “barita magikorik” ez izatea eta erantzukizunetatik ihes egitea leporatu diete. Egiteko modu berriari dagokionez udal aurrekontuak osatzeko modu berria nabarmendu dute EAJtik: Udal gobernu taldeak aurrekontu parte hartzaileak izatea nahi dute, alderdi guztien proposamenekin osatutakoa. “Nola eraikitzen da aurrekontua alderdi guztien artean modu parte-hartzailean, hiri-proiektu desberdinak ditugunean?” bota dute galdera.
Azkenik, oposizioko alderdien kritikak onar ditzatela eskatu diote herri plataformari: “Gobernatzeko eredu desberdinak ditugu, eta beraz, kritika bizi garen sistema demokratikoaren parte da”.
Jarraian, hitzez hitz, EAJkideek esandakoa:
“Ez, ez da abenduaren 28a. EAJ-PNVtik publikoki zoriondu nahi dugu Abotsanitz, oso ondo egiten ari delako. Jakina, ez gara ari Udalaren eguneroko kudeaketaz, ezta datozen urteetan Hondarribiaren etorkizuna markatuko duten proiektuen kudeaketaz ere.
Abotsanitzek hasiera-hasieratik izan zuen abileziaz ari gara: arazo handiez betetako Hondarribia bat marrazten zuen kontakizun bat eraikitzea, irtenbidea beraiek bakarrik zutenentzat. Guztiaren erruduna ere oso ondo identifikatzen zuten: EAJ-PNV. Oposizio-lan oso kritikoari esker, zeinean salaketa gogorrak egin baitzituzten une askotan, eta susmoak maltzurkeriaz sortu, pertsona asko konbentzitu zituzten Hondarribiko Udaleko gobernu- aldaketarekin arazo guztiak konponduko zirela. Baina errealitateak erakusten digu Hondarribian konpondu beharreko kontu asko daudela, eta badirudi jada ez dagoela horiek konpontzeko barita magikorik. Izan ere, askotan erantzukizunei ihes egiten diete eta besteen aurkako kritiketan babesten dira. Baina orain, beraiek dira arazoak kudeatu eta konpondu behar dituztenak. Egiten dituzten komunikazioetan ez dugu jada HAPOari, etxebizitzari, aparkalekuari eta abarri buruzko erreferentziarik ikusten. Orain ez al dira konpondu beharreko gai garrantzitsuak?
Duela gutxi, Abotsanitzek oposizioko taldeen zintzotasun falta salatu du. Hondarribiarekin eta hondarribitarrekin dugun konpromisoa ere zalantzan jartzen du. Bada, EAJan gauza bat argi dugu: hiri honekin eta hondarribitarrekin izan dugun eta dugun konpromisoarena. Hondarribiko garapen-maila eta bizi-kalitatea herritarrek asko baloratzen dituzte, hori ukaezina da. Eta askoren artean eraiki dugu urteetan zehar. Elkarte eta herritarren ekarpenei esker, baina baita Udala kudeatu dugunoi esker. Beste batzuek, berriz, bizikidetza demokratikoa oztopatzen eta gurpiletan makilak jartzen jardun dute urte askotan. Orain, berriz, demokraziaren, berdintasunaren eta aurrerapenaren bermatzaile bakarrak direla dirudi.
Abotsanitz ere zoriondu nahi dugu, “Udaletxean egiteko modu berriaren” inguruan eraikitako kontakizun bikainagatik. Berriz ere, 10 bat komunikazio politikoaren irakasgaian.
Baina diskurtsoak tranpa du. Eta hori oso modu errazean erakutsiko dugu udal-aurrekontuak lantzeko prozesu edo modu berri honekin.
Abotsanitzek alderdi politikoei eskatu digu proposamenak egin ditzagula udal gobernuak aurrekontuaren lehen zirriborroa prestatu aurretik. Horrela, talde politiko guztien artean udal aurrekontua egingo dela esan dute. Argitu nahi dugu erakunde bakar batek ere (udalek, gobernu autonomikoak eta foru-gobernuak) ez duela horrela lan egiten.
Baina Abotsanitzek proposatzen duen prozesu “hain parte-hartzailera” itzuliz. Demagun EAJ-PNV prozesuaren parte izango zela, eskatzen zuten bezala, eta gure proposamen guztiak haiek markatutako datarako egingo genituzkeela. Gure proposamenetako bati erreparatzen diogu: Javier Ugarteko lurpeko aparkalekuaren proiektuari. Abotsanitzek jada esan du ez duela aparkaleku hori defendatzen. Udal-aurrekontuaren proiektuan sartuko duzu? Jakina ezetz! Beraz, nola eraikitzen da aurrekontua alderdi guztien artean modu parte-hartzailean, hiri-proiektu desberdinak ditugunean?
Adibide bat baino ez da, baina uste dugu oso modu errazean erakusten duela “kontakizun bat eraikitzearen” eta errealitatea deskribatzearen arteko aldea. Baina bada gehiago ere:
Abotsanitzek hiriaren eta hondarribitarren etorkizuna eraikitzeko prozesuan parte hartu nahi ez izatea ere leporatzen digu, eta nahiago dugula “eztabaidak lokaztea”. Bada, gustatuko litzaiguke udal-gobernuak HAPOren izapidetze-prozesuaren partaide egingo baligu, tresna hori funtsezkoa baita hiriaren etorkizunerako. 17 hilabeteren ostean, udal gobernuak ez du proiektua udal taldeekin landu. EAJak eskatu ondoren bakarrik deitu gaituzte bilera batera, eta gobernu-taldeak hainbat arlori buruz dituen aukerak azaldu zizkiguten. Baina ez da beste aukerarik izan Abotsanitz eta EH Bilduren Udal gobernuak lan egiten duten modu “kolaboratiboan” lan egiteko.
HAPOak hiriaren etorkizunerako duen garrantziaz jabetuta (etxebizitza, ekipamenduak, dibertsifikazio ekonomikoa…) (ezin dugu ahaztu eta ezin dugu galdu Zubietako Teknologi Campusak suposatzen duen aukera handia), HAPOren tramitazioak aurrera egin dezan laguntzeko prest gaudela adierazi nahi dugu.
Abotsanitzi eskatzen diogu oposizioko alderdien kritikak onar ditzala gauza bat esaten duenean baina kontrakoa egiten duenean. Gobernatzeko eta kudeatzeko eredu desberdinak
ditugu, eta, beraz, kritika bizi garen sistema demokratikoaren parte da. Ez da onargarria beren mezuak baliozko bakarrak direla eta gainerako alderdiek esaten dugun guztia desinformazioa dela adierazi nahi izatea.
Mezu horiek sistema totalitarioei gehiago dagozkie, non pentsamendu bakarra nagusitzen den eta gobernuarekiko kritikarik onartzen ez den. Egoera horretan ez gaudela sinetsi nahi dugu“.
