Indarkeria Matxistaren Aurrean Kaleak Hartu plataforma Kabigorrin elkartuko da
Bidasoan sortu den plataforma berria da eta indarkeria matxistari aurre egiteko eskualde mailako antolakuntza bultzatzea izango dute helburu. Hilaren 23an bilduko dira Kabigorrin.
Bidasoko Indarkeria Matxistaren Aurrean Kaleak Hartu plataforma sortu berri da eta antolatu duten lehenengo ekimenaren berri eman dute. Larunbat honetan izango da (hilak 23) Kabigorrin, eta indarkeria matxistari aurre egiteko eskualde mailako antolakuntza bultzatzea dute helburu.
Izan ere, indarkeria matxistaren bueltako jarrera “oso larriak” zabaltzen ari direla ikusi dute plataformako kideek eta horiek “ideia erreakzionarioen eskutik” doazela azaldu dute. “Indarkeria matxistaren ukapena geroz eta nabariagoa da” erantsi dute.
Era berean, indarkeriaren hainbat forma gorantz ari direla “ukaezina” dela salatu dute, eta errealitate honek antolatzeko “beharrezkotasuna” nabarmentzen duela dio plataformak.
Hartara, eta Indarkeria Matxistaren Kontrako Eguna gertu dela, Kabigorrin elkartuko dira. Lehenik, autodefentsa tailer bat egingo dute, 11:00etan; ondoren, solasaldi bat eskainiko dute indarkeria matxistaren aurrean, eskualdean zer egin eta nola jokatzeari buruz hausnartzeko eta eztabaidatzeko.
