Udalaren flotaren %39 jasangarria da
Ingurune gero eta jasangarriagoa egiteko konpromisoak "irmo" jarraitzen duela berretsi du udalak. Ibilgailu jasangarrien ehunekoak ia 10 puntu egin du gora iaztik.
Udalaren ibilgailu flotaren elektrifikazio prozesuaren berri emateko agerraldia egin dute gaur Borja Olazabal Garapen Jasangarrirako ordezkariak eta Sergio Javier Gobernu Irekiko ordezkariak. Ingurune gero eta jasangarriagoak sortzeko udalak duen konpromisoak “irmo” jarraitzen duela berretsi du Olazabalek, eta gogoratu du iaz lau furgoneta elektriko berri erosi zituztela, eta aurtengo urrian, berriz, lau motozikleta elektriko Udaltzaingoarentzat.
Ibilgailuak erosten dituztenean jasangarritasuna irizpideetako bat da, baita udal langileentzako hobekuntza nabarmenak izatea ere. Horretarako, ibilgailuen beste faktore batzuk aztertzen dituzte, hala nola, elektrizitate kontsumoa edo kargatzeko denbora eta motorren potentzia, eskainitako ekipamenduaren segurtasunaz gain.
Egun, udalaren flotaren %39 ibilgailu berdeak dira; horietatik %100 elektrikoak, hibrido entxufagarriak eta ez entxufagarriak. Iaztik orain arte ia 10 puntu egin du gora Irungo ibilgailu publikoen jasangarrien ehunekoak.
Zortzi ibilgailu erosteko Energiaren Euskal Erakundearen diru laguntza jaso dute, mugikortasun elektrikoari lotutako pizgarrien programako deialdiaren barruan, Next Generation Europako Suspertze, Eraldaketa eta Erresilientzia Planaren esparruan. Diru laguntza 72.000 eurokoa izan da.
