Abenduaren 4an piztuko dituzte Eguberrietako argiak, Operacion Triunfoko Gisela abeslariarekin
Argiak pizteko ekitaldian kalejira ere egingo dute. Argiak pizten alkateaz gain, El Pilar ikastetxeko ikasleak ere egongo dira. Ondoren, Gisela Llado abeslariak Irun Hiria Musika Bandarekin abestuko du.
Eguberrietako argiak piztuko dituzte abenduaren 4an eta hainbat jarduera iragarri dituzte egun horretako arratsalderako. Egunari Eguberri hotsak Irunen izena jarri diote. Argiak eta hiriko apaingarriak pizteaz Cristina Laborda alkateak ez ezik, El Pilar ikastetxeko ikasle talde bat ere arduratuko da.
Ekitaldiaren aurretik, baina, hamaika jarduera egingo dituzte, hala nola, kalejira bat hiriko kaleetan Pablo Mendez Performance konpainiarekin, 17:30ean. Luis Marianotik hasiko dira eta San Juan plazan bukatu.
Gero, argiak pizteko ekitaldia hasiko da eta urtero lez Udal Kontserbatorioko haurren abesbatza bertan izango da, kanta herrikoien kontzertu bat eskaintzeko, 18.30ean. Kontzertua bukatzen denean, 19:00etan, Eguberrietako argiak pizteko ekitaldia hasiko da eta Mateo Bergarak aurkeztuko du.
Aurten, gainera, Irun Hiria Musika Bandako ikasleekin batera Operacion Triunfo lehiaketan parte hartu zuen Gisela Llado arituko da abesten, “Irun osoa pozez, dibertsioz eta ondo pasatzeko gogoz betetzeko asmoz”.
Argiak, abenduaren 4tik urtarrilaren 6ra egongo dira piztuta, egunero, 17:30etik 02:00etara, eta auzoetan, 23:00etara arte. Gabon gauean eta Gabon zaharrean, berriz, 08:00etara arte egongo dira piztuta.
Eguberrietako apaingarriak, datuetan
Eguberrietako kanpaina oraindik ez da hasi, baina udalak hainbat datu eman ditu. Guztira 400 motibo, hiru dimentsioko irudien zazpi diseinu eta 15 metroko zuhaitz bat jarriko dituzte. Halaber, apaingarri berri batzuk ere instalatuko dituzte, Kolon pasealekuan.
Sarjia parkean tirolina eta patinatzeko pista bat egongo dira, eta haurrentzako ludoteka ere. Berritasunen artean, argigune berria egongo da Zabaltza plazan, Antzaranen eta Pio XII plazan. LED Argiak izango dira, efizientzia energetikoa sustatze aldera.
