BATeko harrobia, bikain Espainiako Txapelketan
20 urtez azpiko gizonak Madrilen izan ziren larunbatean, estatu mailako 8 klub onenen aurka lehiatzeko. Espektatiba guztiak gainditu eta seigarren postuan sailkatu ziren.
Iragan larunbatean kluben arteko Espainiako 20 urtez azpiko txapelketako A finalak jokatu ziren Vallehermoson (Madril). Bertan Bidasoa Atletiko Taldeko (BAT) 20 urtez azpiko gizonen taldea izan zen, estatu mailako 8 klub onenen aurka lehiatzeko. Atleta gazteen parte hartzea “bikaina” izan zela adierazi du BATek, seigarren postuan sailkatu baitziren. Honakoa izan da BATeko 20 urtez azpiko gizonen taldea Espainiako 8 onenen artean dagoen bigarren urtea jarraian. Bidasoarrak, gainera, zortzigarren talde gisa iritsi ziren Madrilgo txapelketara, baina “espektatiba guztiak” gainditu eta “lehiakortasun handia” erakutsi zuten seigarren postuan sailkatzeko.
Txapelketa bikaina izan zen hasieratik bukaerara. Une askotan, gainera, laugarren eta bosgarren izan ziren sailkapenean, “kalitate handia” erakutsiz; baina bi deskalifikaziok ohorezko postuetatik aldendu zituzten. BATeko gizonak seigarren sailaktu ziren 79 punturekin, bosgarrenetik soilik puntu erdira.
Emaitzei dagokienean, garaipen bat, hiru bigarren postu eta hirugarren postu bat lortu zituzten BATeko kirolari gazteek. Horrez gain, ohorezko postu mordoarekin ere itzuli dira etxera. Erdietsitako emaitzek BAT bigarren urtez jarraian Espainiako talde onenen artean kokatzen dutela baietsi du klubak. Hona hemen emaitzak:
- 1. Alejandro Esteban: Xabalina jaurtiketa, 59,15 metro.
- 2. Joaquin Alonso: 400 metro, 49,04 segundo.
- 2. Ander Aramendi: 1.500 metro, 04:26,96.
- 2. Mikel Aramendi: 3.000 metro, 08:48,79.
- 3. Luken Aizpurua: Luzera jauzia, 6,47 metro.
- 4. Ander Garaiar: 100 metro, 11,49 segundo.
- 4. Alai Cabello: 800 metro, 01:57,77.
- 4. Jon Gajate: 110 metro hesiak, 16,49 segundo.
- 4. Ander Aristi: 400 metro hesiak, 58,48 segundo.
- 4. Zuazo, Garaiar, Mikelarena eta Aizpurua: 4×100 erreleboak, 43,74 segundo.
- 5. Lukas Cabezon: 2.000 metro oztopoak, 06:20,66.
- 5. Aritz Zuazo: Altuera jauzia, 1,86 metro.
- 6. Egoitz Mikelarena: 200 metro, 23,41 metro.
- 6. Unax Eraso: Mailu jaurtiketa, 50,92 metro.
- 7. Xuban Yarza: Disko jaurtiketa, 32,49 metro.
- 8. Jon Izagirre: Pertika jauzia, 3,41 metro.
- 8. Oinatz Almagro: Jauzi hirukoitza, 12,63 metro.
- 8. Aitor Eizagirre: Pisu jaurtiketa, 9,52 metro.
- Deskalifikazioa: Victor Gamez, 5.000 metro ibilketa.
- Deskalifikazioa: Garrancho, Tabor, Sissoko eta Alonso, 4×400 erreleboak.
