246 pertsonak hartu dute parte Bida-LAN programan
Irun eta Hondarribiko udalek Bidasoa biziriken bitartez garatu dute Bida-LAN proiektua, eta aurtengoan 66 pertsonak lortu dute lana.
Irun eta Hondarribiko udalek Bidasoa biziriken bitartez Bida-LAN proiektua garatu dute. Garapen Agentziak; Irungo La Sallek; Ijitoen Idazkaritza Fundazioak; Emausek eta Mendibil Elkarte Pedagogikoak osatzen duten Kualifikazio eta Laneratze Mahaia osatzen duten eskualdeko hainbat erakunderen arteko lankidetzatik sortu da berau.
Proiektuaren helburua eskualdeko “kolektibo ahulenen” enplegu aukera hobetzea izan da, eta lurraldeko ekonomiarekin, prestakuntzarekin eta enpleguarekin lotutako eragileen parte hartzean oinarritu da.
Nuria Alzaga, Bidasoa bizirikeko presidentea: “Bidasoaldeak erronka garrantzitsua du enpleguarekin, eta erronka handi horren barruan arazo larriagoa dago: pertsona ahulenak eta, beraz, enplegua lortzeko zailtasun handienak dituztenak lan merkatuan sartzea. Bidasoa biziriketik urteak daramatzagu lanean pertsona horiei lana bilatzen laguntzeko, prestakuntzaren, babesaren eta horrelako programen bidez. Programa horiek lan merkatuan sartzeko zailtasun handiagoak dituzten pertsonei zuzenduta daude soilik”.
Ildo beretik, Estitxu Urtizberea Garapen Agentziako lehendakariordeak zehaztu du Bida-LAN “lan merkatutik urrunen dauden pertsonentzat” edo “gutxi enplegatzen diren profiletan sailkatuta egoteagatik sartzeko zailtasunak dituztenentzat dagoela pentsatuta, hala nola kualifikazio gabeko gazteentzat, 45 urtetik gorakoentzat edo iraupen luzeko langabeentzat”.
Lau jarduera nagusi burutzen ditu Bida-Lanek, eta Antonia Garcia Mendibil Elkarte Pedagogikoko kideak azpimarratu duenez, sarean lan egitea eta Bidasoa aktibotik laguntza jasotzea funtsezkoa da kolektibo horiei prestakuntza emateko orduan gure babesa sentitzeko. Eta bide beretik jarraitu du Elisabet Iriarte Ijitoen Idazkaritza Fundazioko kideak: “Asmoa lankidetzan lan egiten jarraitzea da, prestakuntza jasotzen duten pertsonek ere lana aurki dezaten”.
Hala amaitu du Emauseko Elena Frailek: “Sarean lan egiteak erabiltzaileentzako prestakuntza egokia aurkitzeko aukerak areagotu dizkigu”.
246 pertsonak hartu dute parte Bida-LAN proiektuan, eta kalteberatasun egoeran dauden kolektiboetako 66 pertsonak lortu dute lana. Koldo Peciña, Gipuzkoako Foru Aldundiko Proiektu Estrategikoetako Zuzendari nagusiak azaldu duenez, ari dira 2026-2026ko proiektua prestatzen.
