Bizilagunak ekimena irundarrei deika
SOS Arrazakeriak urtero bultzatzen duen programa da eta kulturartekotasuna sustatzeko helburua dauka. Bidasoan ere bazkariak egiten jarraitzeko asmoz, izen emateak azaroaren 15ean bukatuko direla gogoratu dute.
Kulturartekotasuna sustatzeko asmoz, Bizilagunak proiektua berriro egingo dela iragarri du SOS Arrazakeriak. Gipuzkoan egiten da eta iaz 52 bazkari egin ziren. Aurtengoan parte hartzaile kopurua handitu nahi dute, eta irundarrei dei egin diete beste behin ekimenari oihartzuna ematera.
Ekimen honen helburua izan daitezkeen estereotipoak eta aurreiritziak haustea da, eta horretarako, mahai baten bueltan janaria jarri teta istorioak partekatuko dituzte bi familiek. Aurtengo goiburua Hamaika zapore, mila istorio da, eta espero da, gutxienez, beste 52 familiak elkar ezagutzea, harremanak izatea, denboran zehar lotura sendoak eta iraunkorrak sortzea eta dauden kulturen artean bizitzea.
Izena emateko epea zabalik dago jada eta azaroaren 15a baino lehen egin beharko dute interesdunek. Horretarako, SOS Arrazakeriaren Gipuzkoako orrialdera sartu behar da eta Bizilagunak programaren atalean izena eman.
