Doman pabiloia eraisteko lizentzia jaso dute
Halaber, Aduana kaleko 18. zenbakiko pabiloia eraitsiko dute. Bizikidetzaren eta Segurtasunaren Itunari lotutako erabakiak izan dira.
Cristina Laborda alkateak Bizikidetza eta Segurtasunaren aldeko Itunari lotutako bi eraikinen eraisketari buruzko azalpenak eman ditu gaur. Izan ere, Doman pabiloia eta Aduana kaleko beste eraikin bat botatzeko lizentziak banatu dituzte, eta “bizikidetzarako funtsezko” jarduketa gisa irakurri ditu.
Izan ere, “espazio publiko eta pribatuen erabilera egokian” jarri dute arreta eta hiria hobetzeko balioko duen jarduketa dela uste du alkateak. Bizikidetzaren eta Segurtasunaren aldeko Itunean jasotako zenbait neurriri erantzungo diete jarduketa hauek. Eraisketa hauen sestra gaineko elementuetan egingo dituzte, eta ezingo dela jardun eraikinaren zolarrietan, zapatetan edo zoruan zehaztu du.
Gal Stadiumaren alboan, eta Iparralde hiribidean dagoen Doman pabiloia eraitsiko zutela iragarri zuen Cristina Labordak abuztu bukaeran. Horretarako, Doman enpresa eraisketa egiteko lizentzia lortzen ari zen eta behin lortuta, hiru hilabete epea du eraisketa egikaritzeko. Esku hartzera 37.375,23 euroko aurrekontua bideratu dute.
Horrez gainera, Aduana kaleko 18. ondoko higiezina ere eraitsiko dute, Adifena dena jabetzan. Udalak azaldu du eraikinen jabea udala ez denean, eraisteko prozesuak “luzeak eta konplexuak” izaten direla.
Arbesko egoitza
Gaur goizean, Arbesen egoitza bat eraikitzeko obra lizentzia onetsi dutela ere azaldu du Labordak. “Urrats ugari egin behar dira Arbesko egoitza errealitate bat izan arte. Gaur onartu dugun lizentzia funtsezko puntua da proiektuaren garapenean” adierazi du Labordak.
