'Balitik Panamara' eta Maider Otaola ostegunean, Amaia KZn
'Zure abenturaren bila' programaren hurrengo gonbidatua da Otaola. Ostegunean izango da saioa, 19:30ean, Amaia KZn. Sarrera librea da.
Irungo Udaleko Kultura sailak antolatuta, ostegunean (hilak 10) Zure abenturaren bila programaren beste saio bat egingo dute. Maider Otaola izango da oraingoan protagonista, eta Balitik Panamara filma jarriko dute. 19:30ean izango da hitzordua, Amaia KZko hitzaldi aretoan, eta sarrera librea izango da.
Zure abenturaren bila bidaia programa bat da, eta gonbidatuek beren bizipen eta esperientziak kontatzen dituzte bertan. Oro har, bidaiatzeko zaletasunaren inguruan mintzo dira protagonistak.
Saioa euskaraz izango da, eta herrialde berriak deskubritzeko eta lurralde ezezagunak esploratzeko aukera emango du. Ordubeteko saioa izango da, eta solasaldia egongo da Otaolarekin.
Balitik Panamara
Balin hasi eta ia bost urte beranduago Panaman amaitu zen bidaia bat kontatzen du filmak. Beka baten ondorioz eman zituen Maiderrek bidaiatzen lehen urratsak, eta hortik aurrera, mundua ezagutzeari ekin zion. Motxila bizkarrean zuela leku berriak ezagutu zituen, lan ere egin zuen, eta boluntariotzako proiektuetan ere hartu zuen parte. Are, pandemia ere motxila bizkarrean zuela bizi izan zuen.
