Kiroldegiko instalazioetan hainbat hobekuntza egin ditu udalak
Fitness aretoan makina gehiago jarri dituzte, besteak beste, eta aurrerago hiru squash pistak guztiz berrituko dituzte. Horrez gain, ordutegi berria dauka kiroldegiak, Neo Instalazioak enpresak esleipena jaso ondotik.
Artalekun eta Azken Portun berrikuntza lanak egin dituztela azaldu du gaur Borja Olazabal Kirol ordezkariak. Udalak “konpromiso sendoa” daukala kirol azpiegiturak hobetzen gaineratu du, eta “pixkanaka-pixkanaka” egiten ari diren lanak jo ditu adierazgarritzat.
Herritarrek egindako proposamenei erantzuten ari direla zehaztu du eta irundarrei ahalik eta “zerbitzu onenak” izateko inbertsioak egiten jarraitzeko helburuarekin. Hobekuntza hauek ekipamenduen diagnostiko eta analisitik ateratako ondorioetatik atera dute.
Azken hilabeteetan egindako hobekuntzak hainbat izan dira. Batetik, fitness aretoetan makinak berritu eta gehiago jarri dituzte: kardio ariketak egiteko lau makina eta indarra lantzeko hamabi makina. Entrenamendu funtzionalerako areto bat ere sortu dute eta fitness aretotik dauka sarrera, 8 metroko egitura nagusi batean eta 2 metroko egitura batean.
Gazteen partaidetza bidezko aurrekontuen eskariaren ondorioz egin dute berrikuntza hau, eta datozen asteetan elementu gehiago jarriko dituzte. Orain, entrenamendu indibidualak egiteko areto ireki bat da entrenamendu funtzionalerako gimnasioa, baina monitore baten gidaritzapeko taldekako zirkuituak programatuko dira.
Badira ere egiteke dauden hobekuntzak, hala nola, Artalekuko hiru squash pistak osorik berritzea eta horretarako espediente bat tramitatzen hasi da udala. Bestalde, ikasturtean zehar Azken Portu kiroldegiko indoor ziklorako bizikleta berriak erosiko dituzte.
Egokitzapenak ere egin dituzte, eta Azken Portuko erabilera anitzeko kantxa boleibolean jokatzeko egokitu dute. Zehazki, hiru boleibol zelai margotu dituzte, eta zutoinak eta sareak erosi. Boleibolean jokatzeko hirian dauden 60 lizentzia baino gehiagori emandako erantzuna izan da eta lizentzia guzti horiek emakumeenak dira.
Ordutegi berriak
Artaleku eta Azken Portu kiroldegietako instalazioak kudeatzeko kontratu berria esleituta dago Neo Instalazioak enpresari, 2027 urte arte, eta enpresa berri honek ordutegi berria jarri du martxan. Hala, goizetan 06:30ean zabalduko dituzte ateak, eta irailaren 15etik ekainaren 15era bitartean, Artaleku arratsaldez ere irekita egongo da igandeetan.
