Txingudiko Pentsiodunek "bizi baldintza duinak" aldarrikatu dituzte
Gaurkoa Adineko Pertsonen Nazioarteko Eguna da eta aldarri ozena egiteko probestu dute, bizi baldintza duinen eta zaintza duinaren alde.
Hilabeteko azken astelehenetan egin gisan, manifestazioa egin zuten atzo Irungo kaleetatik Txingudiko Pentsiodunen Mugimenduak. Atzokoa, baina, gaurko egunari, urriaren 1ari begirakoa izan da, Adineko Pertsonen Nazioarteko Eguna baita.
Bizkaiko, Gipuzkoako eta Arabako Pentsiodunen Mugimenduarekin koordinatuta, adinekoen errealitatea “oso urrun” dagoela aldundien eta Eusko Jaurlaritzaren diskurtso “autosufizienteetatik” salatu dute. Izan ere, egun indarrean dagoen legediak eta azken murrizketen ez dute betetzen zerbitzuen eskaera soziala, ezta erabiltzaileen eta langileen beharrak ere.
Sektore soziosanitarioko langile emakumeen baldintza prekarioak eta bidegabeak direla salatu dute ere. Gainera, administrazioen helburu “pribatizatzaile eta ekonomizisten” ondorioz, negozio eredu bat sortu dela azaldu dute, eta errentagarritasun ekonomikoa bilatzen duten merkataritza irizpideetan oinarritzen direla ere adierazi dute.
Koordinazio soziosanitariorik ez dagoela azaldu dute, eta egoitza zentroetan unitate soziogeriatrikoak eta soziosanitarioak “nahitaezkoak” izatea galdegin dute. Prozesu eta emaitza irizpide argiak dituen “kalitate eredu” bat eskatu dute, baita ere arreta plan indibidualizatuak, bai ala bai bete behar direnak eta gomendioak ez direnak.
Administrazioei beste aldera begira egotea egotzi diete eta horretan ez egoteko dei egin diete, elkarrizketaren eta gizarte eragileen parte hartzearen norabidea hartzea gomendatuz. Era horretan, zaintza !publiko unibertsal, hurbil duin eta kalitatezkoaren” eredua ahalko dela bultzatu uste dute.
Adinekoek eskubidea dutela bizi baldintza “duinak, pentsio publiko nahikoak, zerbitzu publiko unibertsalak eta etxebizitza osasungarria” izatekoa. Nola bizi erabakitzeko eskubidea aldarrikatu dute, nola hil eta nola zaindua izan. “Pentsio publiko duin eta nahikoak eskatzen ditugu, pertsona guztiok bizi baldintza duinak izan ditzagun” gaineratu dute. Azkenik, haien helburuak lortu arte kalera irteten segituko dutela berretsi dute.
