Indarkeria Matxistaren Eguna antolatzeko dei egin dute Bidasoan
Aste honetan egingo dute lehen bilera, urriaren 3an, Irungo Emakumeen Etxean.
Bidasoko M8 Asanblada Feminista, azaroaren 25eko Indarkeria Matxistaren Aurkako Egunari begira jarri da eta antolatzeko deia egin dute. Hartara, urriaren 3an, osteguna, lehenengo bilera egingo dute Emakumeen Etxean 18:00etatik 20:00etara.
Azken urteetako testuinguru gazi gozoenean hasiko da gorriz markatutako hilabetea eskualdeko feministentzat. Izan ere, pasa den ekainaren 21etik Laure Zacchello urruñarra desagertuta dago eta haren senarraren partetik biolentzia matxistaren biktima izateko “zantzu serioak eta sendoak” daude Sud Ouest hedabidearen arabera.
Senarraren Suzuki Samuraï markako 4×4 auto gorri bilatzen ari da polizia frantsesa eta matrikula GC-494-PR da. Zacchelloren bilaketarekin ere badabiltza eta hari buruzko hainbat datu eman dituzte: 43 urte ditu, 1,65 metro neurtzen ditu, argala da, begi marroiak ditu, ile motz ilunekoa eta ez dakite zein zen azkeneko aldiz jantzita zeraman arropa.
