Bidasos2030ek edukiontzi marroiaren erabilera bultzatu nahi du
Oraingoan, ekimena Larreaundi, Olaberria, Behobia, Bidasoa eta Artia auzoetara zabalduko dute. Bulego ibiltari bat ere jarriko dute.
2030erako eskualdeko birziklatze tasa % 70era igotzeko helburua duen BidaSOS 2030 kanpainak berriro ekingo dio Irunen, eta oraingoan ekimena Larreaundi, Olaberria, Behobia, Bidasoa eta Artia auzoetara zabalduko dute. Hain justu, gune horietan ingurumen hezitzaileek 2.239 etxebizitza bisitatuko dituzte.
Beste gune batzuetan egin zuten moduan, bulego ibiltari bat jarriko dute Eguzkitzaldea kaleko 29. zenbakian, hilaren 16tik 28ra. Ondoren, urriaren 1etik 26ra bulego hori Dario de Regoyos kaleko 17. zenbakira lekualdatuko dute. Arreta ordutegia astelehenetik ostiralera 10:30etik 14:00etara eta 16:30etik 20:00etara izango da, eta larunbatetan 9:00etatik 14:00etara.
Txinzerrekoek esan dutenez, bulego ibiltari honen helburua da herritarrei hondakinen gaikako bilketari buruzko informazio argia ematea; bai eta edukiontzi marroia irekitzeko txartelak, birziklatzeko ontziak eta poltsa konpostagarriak banatzea ere. Gainera, Txingudiko Zerbitzuak-eko ingurumen hezitzaile taldeak etxez etxeko bisitak egingo ditu informazio liburuxkak emateko.
Leire Zubitur Txingudiko Zerbitzuak-eko gerenteak azpimarratu du kanpainak eragin positiboa izan duela aurreko eremuetan: “Irungo erdialdean edukiontzi marroiaren erabileran partaidetza % 11 handitzea lortu dugu. 4. eremuan, Santiago-Beraun, Alde Zaharra, Dunboa, Arbes eta Meaka hartzen dituen zonaldean, partaidetza 15 puntu handitu da”. Haatik, Cristina Laborda Irungo alkateak azpimarratu du oraindik lan handia dagoela egiteko azken helburua lortzeko. “Ekintza txiki bakoitzari esker gauza handiak lor daitezke. Dei egiten diet oraindik konpostaje sisteman alta eman ez duten Larreaundi, Olaberria, Behobia, Bidasoa eta Artiako herritarrei, hala egin dezaten”.
Txingudiko Zerbitzuak eta Irungo Udala lanean ari dira Bidasoa eskualdeak “eredu jasangarriago eta ingurumenarekin konprometituago baterantz aurrera egin dezan”.
