Ludo gudari erromatarra, Bidasoaren maskota
Atzo aurkeztu zuten eskubaloi taldearen maskota, Oiasso Erromatar Museoan. Mikel Anterok egin du pertsonaiaren diseinua.
![](https://bidasoa.hitza.eus/site/files/2024/09/ludo.jpg)
Jokalarien jardun egokiaz eta zaleen bultzadaz gain, irabazteko bidean beste aliatu bat izango du Bidasoak aurrerantzean: Ludo maskota. Gudari erromatarra da bidasoarren familiako kide berria, eta lehenengoz hilaren 22ko partidan (Bidasoa-Bartzelona, 19:00etan Artalekun) ikusi eta gozatu ahal izango dute zaleek. Atzo aurkeztu zuten Ludo; aldi berean, sasoirako elastiko berria ere aurkeztu zuten. Ekitaldia, nola bestela, Oiasso Erromatar Museoak jaso zuen Inoiz ez dugu ahaztu nondik gatozen lelopean. Ludo hitza oinarrizko ikasketak definitzeko erabiltzen zuten erromatarrek, baita jolasarekin, aisiarekin nahiz dibertsioarekin lotutakoak adierazteko ere.
Bazkideen esku izan da maskotaren izaera erabakitzea. Hala zehaztu zuen atzoko aurkezpenean Gurutz Aginagalde kirol elkartearen presidenteak. “Izena bozkatzeaz gain, maskotak zein gai edo izaera izan behar zuen bozkatu dute bazkideek. Behin erromatar gudariaren aukera bozkatuena izan zenean, klubak lanari ekin zion azken emaitza horretara iritsi arte”, adierazi zuen. Mikel Anterok egin du maskotaren diseinua. Hark eman zituen egindako lanaren gaineko zehaztapenak: “Diseinua, kontzeptualki, dirudiena baino askoz konplexuagoa da. Arkatza hartu eta forma eman aurretik, ideia definitu beharra zegoen, eta ezagut daitekeen pertsonai familiar bat bilatu dugu: belaunaldien artekoa da, eta hainbat adin elkartzen ditu”. Diseinatzailea eta arte irakaslea da Antero, eta gainera, bideo-jokoetarako hainbat pertsonaia sortzeaz gain, Fermin Muguruzaren Black Is Beltza kontzeptuaren sortzaile ere izan da, Bidasoak adierazi duenez. Maskota egikaritzea Alive Mascot enpresaren esku gelditu da.
Hona Bidasoak Ludoren gainean eman dituen azalpenak Ludoren izaeraren berri emateko: “Irungo portu erromatarrean aurkitutako anfora erromatar bat ustekabean hautsi zen Oiasso Museorako bidean. Bertan, Merkurio jainkoa zegoen atseden hartzen, jainkoen mezularia eta korrikalari eta kirolarien patroia. Tximistak bezala korrika irtetean, Irun ezagutuko du, eta kirolari handia denez, CD Bidasoaz eta eskubaloiaz maiteminduko da. Inork jainko bat dela jakin ez dezan, Ludo deitzen da (kirola erromatarrez) eta taldeko forofo nagusia izatera pasatzen da. Ludok Merkurioren bi hegal, tximista itxurako Zeusen kapa bat eta txapel modernoz birdiseinatutako kasko urreztatu bat ditu. Gerrian, klubaren armarria darama eta sandalia erromatar batzuk ditu, Oiasso zaharrean bezala”.