Emakume Artean tailerra laugarrenez martxan
Ahalduntze feministarako eta autoezagutzarako gunea da Emakume Artean. Saioak hilaren 24an hasiko dira.
“Ilusio handiz” iragarri dute Emakume Artean tailerraren laugarren edizioa. Ahalduntze feministarako eta autoezagutzarako gunea da, sorkuntza-prozesu baten eta taldeak aberastutako bizipen-esperientzien bidez errazten dena.
“Musika, gorputz mugimendua, dantza, pintura eta jolasaren bitartez, geure buruarekin eta gure taldekideekin konektatzeko, gure emozioak esploratu eta adierazteko, eta gure adierazpen-errepertorioa zabaltzeko aukera bilatzen dugu” esan du Marina de Santa Cruz dinamizatzaileak.
Tailerretan parte hartzeko ez da aldez aurretiko esperientziarik ezta hizkuntza artistikoari buruzko ezagutza teknikorik behar. Izan ere, dinamizatzailearentzat “prozesua da hemen garrantzitsuena, ez azken emaitza. Emakume bakoitzak bere bidea bizitzea eta munduan egoteko modu berriak garatzeko aukera izatea nahi dugu”.
Tailerra hilaren 24an hasiko da eta azaroaren 19ra arte iraungo dute. Saioak asteartetan izango dira , 18:00etatik 20:00etara, Jostaldi pilotalekuan. Doakoak badira ere, 689 24 68 47 telefonora deitu edo helbide elektroniko honetara idatzi behar da, izena emateko. Gure Hegoak elkarteak antolatzen du Hondarribiko Udalaren laguntzarekin.
