Kateako familia baten etxegabetzearen kontra mugitzeko egin du dei Kontseilu Sozialistak
Udalak eskainitako larrialdi sozialetarako etxebizitza batean bizi da egun familia, baina etxegabetzeko agindua jasoa dute. Alternatiba "faltsuak" eman izana salatu dute.
![](https://bidasoa.hitza.eus/site/files/2024/08/captura-de-pantalla-2024-08-27-a-las-11-23-46-1200x816.png)
Katea auzoko Lapurdi kalean bizi den familia bat etxegabetu nahi duela Irungo Udalak salatu du Bidasoko Kontseilu Sozialistak. Familia honen kargu pean sei adin txikiko daudela baieztatu dute, eta orain bizi diren etxebizitza udalaren larrialdi sozialetarako etxebizitza bat dela azaldu dute. Hartara, udalari egotzi diote etxegabetzearen agindua, eta udalak ez daukala etxegabetzea gelditzeko asmorik salatu du etxegabetze arriskuan dagoen familiako kide batek Kontseilu Sozialistak zabaldutako bideo batean.
Udalak, Gipuzkoako Foru Aldundiaren bitartez eskaini dietela alternatiba azaldu dute bideo horretan, baina alternatiba hori “faltsua” izatea salatu dute. “Ez du gure beharrekin bat egiten, eta etxebizitza duin bat bilatzeko denborarik ez digute ematen” azaldu dute.
Egoera zaurgarrian dauden familiak “beste behin” etxegabetuko dituztela salatu du ere Kontseilu Sozialistak, “etxebizitzaren legearen eraginkortasun eza agerian utziz”. Egoera honen aurrean, “antolatzeko eta mobilizatzeko” deia egin dute eta San Juan plazan elkartuko dira datorren hilaren 30ean, ostirala, 18:30ean. Etxegabetze ororen aurka irtengo dira, eta etxebizitzarako sarbide unibertsala bermatuko duen gizarte eredu baten alde.
IRUNGO UDALAK FAMILIA BAT ETXEGABETU NAHI DU.
— Kontseilu Sozialista Bidasoa (@Kontseilua_Bid) August 26, 2024
Etxegabetzeen aurrean antolatu eta borrokatu!
KONTZENTRAZIOA
📅ABUZTUAK 30
📍San Juan Plazan
🕔18:30 pic.twitter.com/ZzxAaNGSYu