Hondarribiko hotelen okupazioak gora egin du uztailean
Iazko uztailarekin alderatua, 8 puntu igo da okupazioa aurten. Dena den, "urte arraroa" izaten ari dela ondorioztatu dute zenbait hotelek.
Palacete hotela Hondarribiko Alde Zaharreko Gipuzkoa plazan. Bidasoa Bizirik-ek iragan uztailean Hondarribiko hotelek izan duten okupazioaren gaineko datuak argitaratu berri ditu. Hauen arabera, %90era iritsi da okupazioa uztailean, iazko urtearekin alderatuta, 8 puntu igo da.
Datuak positiboki baloratu badituzte ere, Jaizkibel hotelekoek adierazi dute “oso urte arraroa” izaten ari dela, “erreserbak azken orduan egiten ari direlako, hein batean, klimaren eraginez”. Gainera, abuztuan iaz baino erreserba gutxiago izango direla aurreikusi dute hotelek.
Herriko turismo bulegoek ere mugimendua izan dute uztailean, orotara, 4747 lagun pasatu dira.
Estitxu Urtizberea Bidasoa Bizirik-eko presidenteak honakoa esan du: “Funtsezkoa da oreka bat aurkitzea Hondarribian bizi diren pertsonen eta bisitatzen gaituzten pertsonen artean. Gure konpromisoa da gure hiriko kultura eta ondarea errespetatuko dituen turismo iraunkorraren alde lan egiten jarraitzea. Turismo hazkundeak gure egoiliarren bizi kalitatean eragin negatiborik ez duela ziurtatu nahi dugu, eta, aldi berean, gure bisitariei benetako esperientzia aberasgarria eskaini nahi diegu. Oreka hori funtsezkoak da Hondarribiaren nortasuna eta xarma mantentzeko, turismo garapen arduratsua eta errespetuzkoa sustatzen dugun bitartean”, esan du.
Urtizbereak aipatutako helburu hori lortzeko, besteak beste, azpiegitura turistikoak modernizatzea eta informazio digitaleko sistemak ezartzea beharrekotzat jo ditu. Gainera, aplikazio mugikorrak eta informazio puntu elkarreragileak garatu dituztela nabarmendu du, “ibilbideak modu eraginkorrean eta jasangarrian planifikatzeko” asmoz.
