Turismo masiboa salatu eta gazteen "behar eta nahiei" erantzuteko gaztetxea eskatu dute
Udalari hastear diren negoziazio prozesuan atzoko agerraldian elkartu ziren guztien borondatea gogoan izan dezatela eskatu dute gazteek.
Argazkia: BGLA. Bidasoko Gazte Langileon Asanbladak Turismo masiboaren ondorioak salatzeko agerraldia egin zuen Arrantzale auzoko arkupeetan.
Abuztua iristearekin bat “kaleen masifikazioa, auto-ilara bukaezinak, prezioen igoera, polizia ugaritzea, aldi baterako lan prekarioak eta kontsumo neurrigabea” gertatzen direla salatu zuten gazteek. Eta dinamika horren ondorioz etxebizitzaren prezioa etengabe igotzen eta kaleak “erakusketarako eremu” bilakatu direla gaineratu zuten.
Joera horren ondorioak, bereziki, gazteek pairatzen dituztela argi dute asanbladako kideek: “Gu gara lan prekario hauetara bultzatuak, prezioen garestitzeak eta debaldeko aisialdirik ezak sozializatzeko aukerarik gabe uzten dituenak eta bertan bizitzeko etxebizitzarik eta alokairurik ordaindu ezin dutenak”.
Orain artean, gauzak horrela direla eta ezer aldatzerik ez dagoela sinestarazi dituztela aitortu zuten, baina beren herrian turista sentitzeaz nazkaturik, gazteen “behar eta nahien arabera bizi ahal izateko” egoerari aurre egitea erabaki dute, eta hori egiteko gaztetxea ezinbesteko tresna dela aldarrikatu zuten: “Ezinbestekoa da bizi dugun errealitateaz jabetzeko, gure intereseko jarduerak egiteko, gazteen arteko harreman sarea indartzeko eta dirua ez dadin beharrezkoa izan edozer egiteko”.
Hori dela eta, udalari hastear diren negoziazio prozesuan atzoko agerraldian elkartu diren guztien borondatea gogoan izan dezatela eskatu dute.
