Kostu murriztua eta bizia izango den herri barneko autobusa nahi dute sozialistek
Hondarribiko sozialistek herri autobusa ezartzeko aldarria egin zuten duela lau legealdi, eta egun apustu bera egiten jarraitzen dute.
2007-2011 legegintzaldian “ekin eta ekin” aritu ziren alderdikideak herri autobus bat eskatzen, eta hainbeste insistitu ondoren, Hamaikabat eta EAJ gobernukide ziren garaian, E25 autobus linea Baserritar Etorbidetik igarotzea lortu zuten, autobusa herriko beste hainbat auzotara heltzea ahalbidetuz. Orduko hartan, gainera, beste hainbat eskakizun egin zituztela gogoratu dute sozialistek; hala nola, nekazaritza inguruneetan bizi diren bizilagunentzako anbulatoriora eta ospitalera heltzeko zerbitzua. Egun Behemendi enpresak kudeatzen du.
2018an bukatu zuten herri autobusa abiarazteko bideragarritasunari buruzko azterlana idaztez, eta 2021ean udalekotze-espedientea zabaldu zuten. Urte hartan Hondarribiko PSE-EEk mozio baten bidez kudeaketa azkartzeko eskakizuna egin zuen. Azkenean, aurtengo ekainaren 25ean osatu zuten herri barruko garraio zerbitzua martxan jartzeaz arduratuko den batzordea.
Sozialistak pozik agertu dira hainbeste urteetan zehar eskatu duten hori, azkenean, egikarituko delako eta zerbitzuak izan beharko lituzkeen zehaztapenak egin dituzte. Beren ustez autobus horiek emisio gutxikoak izan eta kostu murriztua izan behar dute, eta gehienez 20 minutuko itxaronaldia izatea eskatu dute.
