Euskal tradizioei eta folkloreari eskainitako festa, arrakastatsua
Euskal Jiraren 44. edizioak jendetza bildu zuen asteburuan. Irungo Udalak festaren oso balorazio "positiboa" egin dute.
Alaitasuna, umorea eta ondo pasatzeko gogoa ez dira falta izan asteburua honetan; izan ere, Irungo Euskal Jiraren 44. edizioak jendetza bildu zuen iragan asteburuan.
Egitaraua oso oparoa izan zen, guztira hogeita hamar proposamen inguru antolatu zituzten. Urdanibia plazan, besteak beste, gurdi erakusketa, bertso saioa, txalaparta, edota Gipuzkoako Pentatloi txapelketaz gozatu zuten.
Aurten, gainera, ostiralean hasi ziren motorrak berotzen. Arratsaldean Irungo Atseginako erraldoiak irten ziren kalera eta Burrunba elektrotxarangarekin batera kalea alaitu zuten. Ohiko formatutik at, modu informalagoan eta zutik jardutekoan aritu ziren, eta “izugarrizko arrakasta” izan zuela adierazi du udalak.
Larunbatean, berriz, artisautza eta artea izan ziren tokiko produktuen protagonistak. Guztira 22 erakustari aritu ziren eta denetik eskaini zuten. Kirol zaleek ere txapelketa bikainaz gozatu zuten. Gipuzkoako Pentatloi txapelketa Andoni Iruretagoienak, Izeta IV.nak, irabazi zuen hirugarren urtez jarraian. Horretarako, 24:22ko denbora behar izan zuen.
Azkenik, Irungo Udalak eskerrak eman dizkie batzorde antolatzaileari, bai eta inplikatu guztiei.
