Munduari bira emango dio Fermin Muguruzak
Mundu osoan zehar 18 kontzertu eskainiko ditu musikari eta zinemagile irundarrak, bere ibilbidearen 40 urteak ospatzeko. Lehen sarrerak, hilaren 23an jarriko dira salgai.
40 urteko ibilbidea ospatzeko bira mundiala egingo duela iragarri du Fermin Muguruza musikari eta zinemagile irundarrak. Gaur goizean iragarri du Muguruzak kontzertu bira, gaurko egunez atera baitzuen Kortatuk bere aurreneko maketa, Kortatu.
Euskal Herrian kontzertu bakarra eskainiko du bira horren bueltan eta Donostian izango da, 2025eko ekainaren 14an. Kontzertu honetara joateko sarrerak igande honetan (hilak 23) jarriko direla salgai azaldu du Muguruzak, 09:00etan. Gainontzeko sarrerak hilaren 25etik aurrera ahalko dira eskuratu.
Bideo baten bidez jakinarazi du 2025ean egingo duen kontzertu bira. Harekin batera izan dira bere bidelagun izan diren hainbat aktore: Aitziber Garmendia, Itziar Ituño, Jon Plazaola, Maria Cruickshank, Hofe, Amaia Jackson, Ñako eta Jone Unanua.
- Urtarrilak 18: La Laguna, Tenerife, Kanariar Uharteak. (EC Aguere).
- Urtarrilak 24: Bartzelona, Herrialde Katalanak. (Palau Sant Jordi).
- Otsailak 15: Madrid. (Wizink Center).
- Martxoak 15: Konpostelako Santiago. (Fontes Do Sar).
- Martxoak 21: Paris, Frantzia. (La Cigale).
- Martxoak 22: Bordele, Frantzia. (Salle Du Grand Parc).
- Martxoak 28: Tolosa, Frantzia. (Le Bikini).
- Martxoak 29: Marseilla, Frantzia. (Espace Julien).
- Apirilak 12: Zurich, Suitza. (Rote Fabrik).
- Maiatzak 16: Berlin, Alemania. (SO36).
- Maiatzak 20: Santiago de Chile, Txile. (Teatro Cariola).
- Maiatzak 24: Buenos Aires, Argentina. (Estadio Obras).
- Maiatzak 28: Bogota, Kolonbia. (Calle 13).
- Maiatzak 31: Mexiko Hiria, Mexiko. (Skatex, Texcoco).
- Ekainak 4: Erroma, Italia. (TBC)
- Ekainak 14: Donostia. (Anoeta Estadioa).
- Uztailak 23: Tokio, Japonia. (Radical Music Network).
- Urriak 4. Azken kontzertua. Tokia iragartzeke.
