Bulego, Nogen edota The Iiingles taldeak Irun Zuzenean jaialdian
Irailaren 27an eta 28an egingo da "ikuspegi feministarekin" ondutako jaialdia. Sarrerak, ekainaren 4tik aurrera ahalko dira eskuratu.
Kultura eta Gazteria departamentuek bat egin eta Irun Zuzenean jaialdiaren 8.edizioa ondu dute. Gaur egin dute aurkezpena San Juan plazan eta iragarri dute irailaren 27an eta 28an izango dela aurtengoa. Nagusiki pop eta indie rock musika generoei lotutako musika jaialdia da Ficoban egingo den hau. [Egitaraua, azpian]
Nuria Alzaga Kultura ordezkariak adierazi du “kalitatea eta kantitatea nonahi” dituela aurtengo kartelak, bai musika estiloetan bai eta kontzertu bakoitzaren xede den publiko motan ere. Etxeko eta Espainiako musika taldeak igoko dira Ficobako oholtzara. Etxetik, hala nola, The Iiingles eta Erenere hondarribiarrak izango dira. Espainiatik, berriz, Rulo y la Contrabanda edota Tiburona.
Alzagak gaineratu du emakumeen presentzia oholtzan ere kontutan hartu dutela: “Kartela ikuspegi feminista batekin ondu da eta emakumezko artistek rol protagonista dute urtero-urtero. Ikuspegi horri helduta jarraituko dugu lanean”. Iaz, 2.000 ikusle jaso zituen jaialdiak eta “sekulako arrakasta” izan zela erantsi du Sergio Javier Gazteria ordezkariak.
Sarrerak ekainaren 4ean jarriko dituzte salgai. Bi egunetarako bonua edota egun baterako sarrera ahalko da lortu. Erosi ahal izateko Irun Zuzenean plataformaren orrialdera joan behar da.
Irailak 27, ostirala
- BULEGO
- NIÑA POLACA
- NOGEN
- THE IIINGLES
- DJ ERENERE
Irailak 28, larunbata
- RULO Y LA CONTRABANDA
- SEXY ZEBRAS
- RUFUS T.FIREFLY
- TIBURONA
- LATIDO
