Emakumeen Ohorezko Mailako taldea, Durangora
BATeko emakumeen talde nagusiak Espainiako maila goreneko bigarren jardunaldia jokatuko du igandean Durangon. Duela bi aste Iruñean lortutako hirugarren postua errepikatu nahi dute, maila mantentzeko helburua lortzeko.
Argazkia: BAT. Bidasoa Atletiko Taldeko emakumeen Ohorezko Mailako taldeak hitzordua du igandean Durangon. Duela bi aste hirugarren postua lortu zuten Iruñean egindako topaketan, eta igandean Espainiako maila gorenean mantentzeko lehiari berrekingo diote.
Iruñekoa ligako lehen jardunaldia izan zen, eta argi geratu zen Ohorezko Mailan dagoen berdintasuna. BATeko emakumeak hirugarren postua lortzeko xedearekin joan ziren Nafarroako hiriburura, eta helburu hori lortu zuten topaketa horretan. Hospitalet taldearekin lehia bizia izan zuten hirugarren postu horretarako, baina puntu bateko aldearengatik nagusitu ziren bidasoarrak. Baja esanguratsuak izan arren, Iruñean sentsazio onak izan zituzten BATekoek, eta bide horretan jarraitu nahi dute Durangon.
Durangoko jardunaldirako, aldaketa batzuk jasan ditu BATeko taldearen deialdiak. Iragan jardunaldian lesionatu ondoren, Malen Martinez deialditik at geratu da, eta ezin izango du hesietako 100 metrotako proban lehiatu. Irune Muguruza izango da bere ordezkoa.
Jauzi hirukoitzean Sofia Rchi fitxaketa berria eta Taiwo Oladimeji, Eider Zumeaga eta June Garciaren ordez sartu dira deialdian. Altuera jauzian, lesio batetik osatu ondoren, Naia Llorente Durangon izango da igandean. Llorente Ainhoa Sagasteren ordez sartu da deialdian.
Irune Muguruza hesietako 100 metrotako proban arituko da, eta Julene Aranburuk eta Jone Isusik, aldiz, hesietako 400 metrotako proba jokatuko dute. Alaine Garrido deialdira itzuli da 400 metrotako proba lehiatzeko, eta 16 urtez azpiko taldeko Elene Salcedok Coral Cortes ordeztu du.
Helburua, maila mantentzea
BATeko emakumeek helburu argi bat dute ligarako: Ohorezko Mailan mantentzea. Horretarako, garrantzitsua izango da haientzat Iruñean lortutako hirugarren postu hori errepikatzea Durangon. Manresa, Sprint eta Atletiko San Sebastian taldeekin arituko dira nor baino nor igandean. Hiru taldeak “gogorrak” direla aitortu du klubak, eta proba guztietan nabarmentzeko atleta “lehiakorrak” dituztela gaineratu dute.
Hauxe da deialdia:
- 100 metro: Carla A. Martinez eta Laia Olaskoaga.
- 200 metro: Carla A. Martinez eta Martina Villar.
- 400 metro: Alazne Garrido eta Alaine Agerralde.
- 800 metro: Izaskun Sanz eta Elena Martin.
- 1.500 metro: Miriam Gregori eta Elena Martin.
- 3.000 metro: Miriam Gregori eta Sara Mancisidor.
- 100 metro hesiak: Irune Muguruza eta Victoria Briso.
- 400 metro hesiak: Julene Aranburu eta Jone Isusi.
- 3.000 metro oztopoak: Laura Fole eta Nahia Pikabea.
- Pertika jauzia: Lorena Vives eta Malen Orduña.
- Luzera jauzia: Victoria Briso eta Elene Salcedo.
- Jauzi hirukoitza: Sofia Rchi eta Taiwo Oladimeji.
- Altuera jauzia: Eunate Martinez eta Naia Llorente.
- Pisu jaurtiketa: Goizane Garcia eta Marta Blanco.
- Disko jaurtiketa: Sarai Larrinaga eta Arielle Ngole.
- Mailu jaurtiketa: Lissete Arreaga eta Goizane Garcia.
- Xabalina jaurtiketa: Blanca Garcia eta Marta Mancebo.
- 5 kilometro ibilketa: Ana Pulgarin eta Pinar Polo.
- 4×100 erreleboak: Ana, Laia, Martina eta Leire.
- 4×400 erreleboak: Alazne, Irune, Julene eta Jone.
